Hunbi vawn dik a pawimawh - PC Vanlalruata

Irrigation & Water Resources Department Staff Welfare Association of Mizoram (ISWAM) General Body Meeting vawi 8-na chu nimin khan IWRD auditorium-ah neih a ni a, Irrigation & Water Resources minister PC Vanlalruata'n hmanpuiin, "Hunbi vawn dik leh rinawm taka mahni koa mawhphurhna awmte hlenchhuah ṭhin a pawimawh," a ti.

PC Vanlalruata chuan, IWR hnuaia thawktute chu mipui tana an rawngbawlnaah mawhphurhna hrang hrang hlen chhuak tura rinawmna leh inpekna tilangtu ni zel turin a fuih a, "Thiamna leh theihna inang lo tak tak awm hona pawl a nih angin inmamawh tawn ṭheuh in ni a, zahawm leh hawihhawm taka indawrtawnna chuan inpumkhatna ṭha a siam ṭhin. Thawhhona kawngah hunbi vawn dik leh rinawm taka mahni koa mawhphurhna awmte hlenchhuah ṭhin a pawimawh," a ti.

Ṭanrualna leh thawhhona ṭha siam tur hian staff welfare association hmalakna a pawimawh tih sawiin PC Vanlalruata chuan, "Mi tam tak thawhrimna chu mi tlemte inthlahdahna avangin a hlawhchham phah thei," a ti a, hnathawhna hmunah tunlai thiamna hmang ṭangkai thiam mi nih tum turin ISWAM member-te a fuih.

ISWAM General Body Meeting-ah hian kum 2022-24 inkara an pawl hmalakna hrang hrang tarlan a ni a; member zinga kai sang lawmpuina te, member thar lawm luhna leh kum 2022-24 chhunga member boral parukte sunna hun hman a ni. IWRD hnuaiah hian Chief Engineer office, Lunglei division, Kolasib division, Champhai division leh Aizawl division hnuaiah thawktu mi 120 an awm mek a ni.