Minister-in zirlai ti ṭhate chawimawina a hmanpui

Minister Lalthansanga chuan nimin khan Berawtlanga Art and Culture Auditorium-ah National Institute of Electronics and Information Technology (NIELIT), Aizawla zirlai tharte lawmna leh zirlai chhuak tur zinga ti ṭhate chawimawina, 'Freshers Social & Felicitation of Rankholders' a hmanpui. Minister chuan, zir chhuak turte chu sorkar policy Bana Kaih chu ngaihven turin a chah.

Lalthansanga chuan, eizawnaa nei tura ṭhalaite tuihal zia a hmuh chuan a ngaihtuahna a tihthui thu a sawi a, "Ram leh hnam tundin nan mawhphurna nei vek kan ni a, in zirlai in zir chhuah hnua in kawngzawh apiangah in duhthlanna uluk takin hmang ang che u," a ti a, zir chhuak turte chu sorkar policy Bana Kaih chu ngaihven turin a chah a ni.

Deemed to be university dinhmuna NIELIT hlankai a ni chu a lawmpui thu sawiin Lalthansanga chuan, "Chutihrualin ngaihtuahna thui tak sèn a ṭul a, tunlaiah a hma lama mahni kawng tur thlan uluk a, thiamna bik neih a tulzia ngaihtuahin NIELIT-ah chutiang tura zirlaite chher an ni hi a lawmawm hle," a ti a, NIELIT hotute chu a theihna apiangah NIELIT hmasawnna tura hmalakpui a tum thu a sawi bawk.

Zirlai ti ṭhate chawimawina hunah hian MZU hnuaia MCA, MSc (Electronics), BCA rankholders-te bakah, Mizoram State Council for Technical Education (MSCTE) hnuaia Diploma in Computer Science and Engineering rankholders-te leh Diploma in Electronics and Telecommunication Engineering rankholders-te hnenah chawimawina thuziak hlan an ni.

NIELIT, Aizawl hi kum 2001 aṭanga din niin, formal course (MCA, Msc, BCA, DETE leh DCSE)-ah mi 3,065 leh non-formal course (O Level, A Level)-ah mi 2,953-in an zirchhuak (training) tawh. Short/term course (CCC, CAAPA, Cyber Security etc.)-ah mi 65,347 leh project hnuaiah mi 36,385-te zirtir an ni tawh bawk.

University Grant Commission (UGC) chuan tunhnai khan NIELIT hi 'Deemed University' nihna a pe thar a; main campus hi Ropar, Punjab-ah a awm dawn a, NIELIT Aizawl Centre leh centre dang 10-te chu university off-campus unit an ni thung ang.

NIELIT Deemed University hnuaiah hian diploma engineer-ing, BCA, BTech, MTech, MCA, MSc (IT/Electronics) bakah PhD zirna thlengin a awm a, ST/SC zirlaite tan a thlawn vekin a zir theih a ni.