International Conference on MSMEs buatsaih

Federation of Industries in North Eastern Region (FINER) bultumin nimin khan Aizawla IPR Auditorium-ah ‘International Conference on MSMEs in North East’ buatsaih a ni a; Commerce & Industries minister F Rodingliana'n a hmanpui.

F Rodingliana chuan, Mizoram chu agro-based leh horticulture based industries tan theihna (potential) nasa tak nei a nih thu leh heng theihnate hi haichhuah loh a la nih thu a sawi a, "Tun sorkar kal lai mek hian chutiang haichhuah nan leh mi taimate dinchhuah ve nan 'Bana Kaih (Hand holding) policy a duangchhuak a, MSME-te pui turin sorkar a ding reng dawn a, tunah pawh hian sumchang thlai - aieng, sawhthing leh hmarcha chîngtute tan ruahhmanna felfai tak siam niin, anmahni dawmkanna tur sum pawh budget dah a ni," a ti.

Mizoram chu tlangram a nih thu leh inkalpawhna kawngpuite a ṭhat tâwk loh thu sawiin Rodingliana chuan, "Kum khatah ni 100 chuangte ruah a sur bawk nen industry din leh project han kalpui nan sum sèn pawh a sang deuh. MSME policy leh guidelines pawh state dang leh hmun danga an hman angte hi hman ve diak diak theih loh chin a awm a, mahse Mizoram chu India rama state ralmuang ber a ni a, lehkhathiam tamna leh sakhua khat leh culture khat vuan kan nihna hian thiltih a ti awlsam," a ti a; India ram state dang leh India ram pawna MSME-te chu Mizoramah industry din a, tualchhung mi MSME-te leh sorkar nen thawkho turin a sawm.

He hunah hian entrepreneur te, MZU leh college hrang hrang panga aṭangin entrepreneurship lama tui zirlai naupang an tel a; Taiwan aṭanga lokal Ru Yi Yong chuan 'Bamboo Sector Opportunities’ tih thupui leh Jui Tai Hong chuan 'Opportunities in MSME Sectors' tih thupui leh, MZU-a Department of Food Technology asst. professor Dr Himayoti Dutta chuan 'Food processing in Mizoram through academia and research perspective' tih thupui a sawifiah a, Commerce & Industries director Maria CT Zuali leh Mizoram MESME DI Diwakar-te pawhin thu an sawi.