Kolasib DC hoin kawng siam mek thlirlet

Nimin khan Kolasib DC Robert C Lalhmangaiha hoin DC conference hall-ah national highway 306 leh 06 thawm ṭhat hna thawh mek thlirlet a ni a, Kolasib SP David H Lalthanglianian, addl. DC. PWD, NHDCIL, Kolasib District Truck Owners Association (KDTOA) leh JAC Coordination Committee, YMA leh contractor-te an tel.

Meeting-ah hian Kolasib district chhunga NG 306 leh 06 chhia avanga Kolasib District Truck Owners Association leh JAC Co Ordination Committee-te'n August22, 2024 a kawng an dan hnua inremna leh hna chak zawk a thawk tura intiamkamna lehkha August 23, 2024 a an ziah; an hun tiamkam chhung a zawh tawh avanga hmalakna thlirlet a ni.

He hunah hian JAC te chuan kawng siamṭhat kal mek an vilna aṭanga an hmuh dan leh rawtnate an tarlang a, MPWD leh NHIDCL ten an hmalak tawhna report an pe bawk.

Kolasib DC chuan tun hnaiah kawng chhia avangin mi tam takin harsatna an tawk tih sawiin, "Lirthei lian duh anga a tlan theih loh avangin Mizoramah tuialhthei leh ei leh bar ah hatsatna a thleng mek a, he harsatna sukiang tura theihtawp chhuahtu KDTOA leh JAC-te an fakawm hle. Tun dinhmunah harsatna hrang hrang avangin kawng chu duhthusam la ni lo mah se, hmasawnna a awm chho zel," a ti a, theihtawpa ṭan la leh zual turin NHIDCL leh PWD hotute a chah.

KDTOA leh JAC Coordination Committee-te tarlan danin, kawng hi an intiamkamna anga chhutin PWD NH Division III chanah hmalakna 55% vel leh NHIDCL chanah hmalakna 45% vel hmuh a ni.

NHIDCL Manager (P) Saksham Tyagi chuan development work, fourlane-ah an insawrbing thu leh maintenance atan hian fund a tlem hle avangin hnathawh a harsat thu a sawi. An harsatna liantham a tarlan zingah qarry neitute hnathawhna avanga kawng leh side drain-a an stone dust leh lei nawi tla nasa lutuk chuan hnathawh a tih harsat bakah tui nasa takin a tling ṭhin a, chu chuan hmasawnna a tih muan thu a sawi.

Ṭhutkhawmnaah hian theih anga chaka hmalakna chhhunzawm tura rel niin, KDTOA leh JAC Coordination Committee mai bakah Sub Hqrs YMA pawh Additional DC Chairman na hnuaia monitoring-ah tel tawh tura rel niin, he monitoring team hian kawngpui siam mek hmalakna hrang hrangte an endik ṭhin dawn.