ICT Minister-in workshop a hmanpui

Information & Communication Technology (ICT) department leh sorkar laipuia National e-Governance Division (NeGD), MeitY ṭangkawp chuan nimin khan Aijal Club-ah 'Awareness and Sensitization Workshop on User Experience & Design System' an buatsaih a; ICT minister Dr Vanlalthlana'n a hmanpui.

Dr Vanlalthlana chuan, tunlai khawvelah mipuite'n awlsam taka hman theih tur website emaw, apps emaw an mamawh thu a sawi a, "Technology-in min khalh kal nasat tawh avangin tuna website kan neih laite pawh mipui tan a ṭangkai thei ang ber turin enkawl zui a ṭul. Information mamawh en nan sorkar website hrang hrangte ka tlawh kual nasa ṭhin a, information pawimawh pawh dah mumal lo leh enkawl ṭha tawk lo an awm nual. Kan website leh apps-te hi mipui hman ṭangkai tur a nih avangin ṭan kan lak a ngai a ni," a ti.

Sorkar website-ah homepage mai ni lo, a chhung thu leh information pawimawhte update kawngah theihtawp chhuah thar a ṭul thu sawiin Minister chuan, "Department information pawimawhte, dan leh hrai (Act & Rules) kaihhnawihte leh notification/orders awm ang angte website-ah regular taka update-a, mipui tana information pawimawh dahkhawmna hmun ṭha tak nei ṭheuh ang che u. Information technology kaltlangin inrelbawlna ṭha zawk kan thlen thei a," a ti a, sorkar website leh apps enkawl kawngah UI/UX ngaih pawimawh a ṭul thu a sawi.

He hunah hian Mizoram sorkar hnuaia department hrang hrang leh a hmang ṭangkai thei tur Mizorama central sorkar office aiawhte an tel a; thupui panga zirho niin, zawhna leh chhanna hun hman a ni.