Department-te'n faina hnatlang

UDPA department hnuaia Swachh Bharat Mission (Urban) leh PHE department hnuaia Swachh Bharat Mission (Grameen) ṭangkawp hmalakna kaltlangin Swachhata Hi Seva 2024 kalpui mek leh Faina Hapta (Cleanliness Week) 2024 pualin nimin khan sorkar department hrang hrang chuan an office leh a chhehvel tihfai hnatlang an nei.

Swachhata Hi Seva hnuaiah hian Mizoram pum huapin khawpui leh thingtlangah faina kawnga hmalakna tur hrang hrang 2,052 ruahman a ni a; bawlhhlawh chhêk khâwm tam zualna 398 (cleanliness target units - CTU) thlanchhuah niin, he'ng zinga 262 hi tihfai a nih tawh thu sorkar thuchhuahin a tarlang.