KHAWTHLIR

PUC-in thisen pe

Pachhunga University College NSS chuan National Voluntary Blood Donation Day (October 1) pualin nimin khan an campus-ah thisen pek runpui an huaihawt a, Civil Hospital, Aizawl tan thisen unit 251 an pe a, petute mipa 171 leh hmeichhia 80 an ni.

Sakawrdaiah  kawng zawh

September 19, 2024-a an chenna ina thia hmuh Lalniengi (49) w/o RT Kima (L), Sakawrdai chu thah ni ngeia an ngaih avangin Sakawrdai NGO-te chuan tualthattu chhui chhuah phutin September 26, Ningani khan kawng an zawh. Lalniengi hi September 19 zing dar 6 vel khan an chenna inah thia hmuh a ni a, a nghawngah rehna hnuhma ni ngeia hriat hmuh a ni a, a thawmhnaw hak dan pawh a mumal lo deuh.

India palai

Sorkar laipuia Ministry of External Affairs joint secretary ni mek B Vanlalvawna, IFS chu India sorkarin Cambodia rama India palai, ambassador atan a ruat thar tih sorkar thuchhuain a tarlang.

Ui chhuah khap

Champhai district magistrate VL Remliana chuan nimin khan The Mizoram Animal (Control & Taxtation) Act, 2014-in vantlang hmun leh mimal ramah ran chhuahtir a khap thu a tarlang a; "Khawlaia ran chhuakte chu village council-te'n mantirin, a neitute Rs 500-a tlantir zel tur a ni. Tunlai hian Champhai khawpuiah khawlaia ui tla mai mai hmuh tur an tam hle a, hei hi mipui tana hlauhawm thei a ni tih kan hriat ṭheuh a pawimawh. Chuvangin VC-te chu hetianga khawlaia ui tla mai maite hi khuahkhirh leh man tura nasa taka hma la turin kan inngen a ni," a ti.

Faina kawng zawh

Mizoram University-a Department of Tourism and Hospitality Management chuan nimin khan World Tourism Day lawmna pualin MZU guest house aṭanga Tanhril Presbyterian Biak-In thleng kawng an zawh a; MZU vice chancellor Prof. Dibakar Chandra Deka-in a hmanpui. He ni pual hian MZU guest house-ah MZU Tourism department hian ‘Tourist Information Desk’ an buatsaih bakah, MZU leh a chhehvel thenfai hnatlang an nei.