Duhoma insawifiah tura tih a ni
MNF party aṭanga MLA 12-te'n ZPM Legislature Party (ZLP) leader Lalduhoma, MLA aṭanga a bàn theih nana Assembly speaker Lalrinliana Sailo hnena an hêk avangin Legislative Assembly chuan September 24, Ningani khan Lalduhoma chu insawifiah turin a hriattir. Hetih lai hian, Lalduhoma chuan, Assembly Speaker-in a bàn a nih chuan Court-a a zualko nghal tur thu a sawi.
Legislative Assembly Secretary chuan September 24 khan Lalduhoma hi hêk a nih chungchangah insawifiah tura tihna lehkha a thawn a, ni 14 chhung hun a pe. Vanglaini palai zawhna chhangin Lalduhoma chuan, insawifiahna a thehluh hun tur thu a la sawi theih loh thu a sawi.
Assembly Speaker-in a bàn chuan Court-ah a kal nghal tur thu sawiin Lalduhoma chuan, "Dan bawhchhiat ka nei lo tih hi ka dinna a la ni reng, bawhchhiat ka nei miau lo. Zàmna pakhat mah ka nei lo," a ti.
Tarlan tawh angin, MNF MLA zinga mi 12 chuan September 22-24 chhung khan Lalduhoma, MLA aṭanga bàn turin Assembly speaker Lalrinliana hnenah lehkha an thehlut a; lehkhaah chuan, Lalduhoma'n Indian Constitution 10th Schedule Para 2(2) a bawhchhia niin an tarlang.
MNF MLA-te tarlan danin, Lalduhoma hi MLA atan independent ticket-a thlan tlin a ni a, inthlan hnuah vantlang hriatah ZNP party chu ZPM party tharah an inchhûn luh vek thu a puang a ni. ZPM pisaa inkhawmnaah ZPM party-ah mi a lawm lut bawk.
Lalduhoma chuan, Anti Defection Law bawhchiaah a inngaih loh thu sawiin, "Anti Defection Law chu miin anmahni thlang tlingtute an phatsana hman tura siam a ni a, kei chuan min thlang tlingtute ka phatsan lo. ZPM candidate-te chu common symbol, flag leh manifesto thuhmun vek kan ni," a ti.
Speaker Lalrinliana Sailo pawhin, Lalduhoma hêk a nihnate chu zir chiangin, dan ang taka thutlukna a siam tur thu a lo sawi tawh a ni.