MP-in Jeje-a chungchang Union Minister-ah a thlen

Rajya Sabha MP K Vanlalvena chuan September 24, Ningani tlai khan Union Sports minister Kiren Rijiju chu a chênna inah a kâwm a, Mizo footballer Jeje Lalpekhlua'n Arjuna Award a dawng lo a hriatthiam loh thu a thlen.

K Vanlalvena chuan, Jeje-a chu infiammite chawimawina sang Arjuna Award dawng thei turin vawi eng emaw zat rawt (nominate) a ni tawh tih sawiin, chuti chunga award dawng tura thlan a ni ngai lo chu hriatthiam harsa a tih thu Kiren Rijiju a hrilh a; India ram tan leh a khelhna club hrang hrang tana Jeje-a'n hlawhtlinna a neihte leh a thawh hlâwk dante ziakin a pe nghal a ni.

Hun lo kal turah ram tana a hnathawh ropui tak avangin Jeje Lalpekhlua chu India sorkarin a phû ang ngeiin chawimawina a pek a beisei thu, Vanlalvena chuan a sawi. Rajya Sabha MP hian Union Sports Minister hnenah hian Mizoramah archery training centre dah tur te, Olympic 2028 atana inbuatsaih mek Mizoram Taekowndo Association hnenah an mamawh infiamna hmanrua leh bungrua ṭha zawk pe tur leh, Sports Authority of India (SAI), Mizoram chu SAI, Manipur aṭanga a hranga dah a, SAI, Assam hnuaia dah tawh zawk turin a thlen bawk.