Biate-in serthlum nuai 90 vel man hralh

Biate khuaa Serthlum chíngtute chuan tunlai hian serthlum an hralh mek a, cheng nuai 90 vel man hralh tawhin, mimala hralh tam berin cheng nuai 5 chuang hret man a hralh. Nikumah cheng nuai 100 vel man an hralh thung.

Serthlum Chingtu Association, Biate secretary R Lalduhawma sawi danin, kuminah vai hoin Biate khaw mite serthlum an leina chu Rs. 72,00,000 man a ni a, vai hnena hralh ve lo Rs. 20,00,000 man vel a awm bawk a; a vaiin nuai 90 man hralhah an inngai.

Biate khuaa serthlum chíngtu, páwla inziak lut chu mi 100 vel an ni a, chíng thar, la puitling chiah si lo leh member la ni lo eng emaw zat an awm. Serthlum chíng hrim hrim chu chhungkaw 200-250 inkar vel an ni.

Kumina Biatea serthlum hralh tam ber Rochhunga chuan Rs. 5,00,000 chuang hret man a hralh a; a tam ber chuan Rs. 40,000-50,000 vel man an hralh a, chu'ng mite chuan vai hnena hralh aiin, a mala hralh an duh a, Aizawl, Serchhip leh Lungleiah an hralh ṭhin.

Biate khuaa serthlum chingtute hian kum 2015-ah cheng nuai 40 vel man, kum 2016-ah nuai 60 vel man, kum 2017-ah nuai 9 vel man, kum 2018-ah nuai 90 vel man leh kum 2019-ah nuai 100 vel man an hralh. Kum 2017-a an hralh chhiat chhan chu ruahtui vangah an ngai a, Horticulture department lama mithiamte pawhin an enfiah a ni.

R Lalduhawma chuan, "Serthlum chíngtu kan pung zel a, enkawl a hautak avangin vitamin an mamawh nasa a, department aṭanga subsidy kan dawn pawh kan indaih meuh lo," a ti.