September chhunga Food Security Act Hmang turin Mizoram sorkar hriattir a ni

Sorkar laipui chuan Mizoram sorkar hotute hnenah lehkha thawnin, September 30, 2015 ral hma ngeia Food Security Act (FSA) hmang turin a hriattir. Kum 2011 chhiarpui aṭanga chhûtin, FSA hian Mizorama mihring 7,06,296 (64.30%) a huam dawn a ni.

Thu dawn danin, sorkar laipui chuan FSA hman ṭan hun sawn hlat a lo ni tawh ṭhin thu tarlangin, September 30, 2015 bak chu pawhsei a nih tawh dawn loh thu Mizoram sorkar hnena lehkha a thawnah hian a tarlang.
FSA hi hman a nih chuan, a huam tel lohte tan chuan sorkar aṭangin buhfai man tláwmin an lei theih tawh dawn loh a ni.
FSA-in a huam chin tur mi 7,06,296 zinga 1,28,114 chu above poverty line (APL) an ni. APL bikah hian chhungkaw pakhatin thla khatah buhfai a man tlawmin kg. 35 an lei thei dawn a, APL ni lo FSA-in a huam chinte chuan mi pakhatin thla khatah buhfai kg. 1 Rs. 3 zelin kg. 5 an lei thei ang.
Food, Civil Supplies & Consu­mer Affairs department chhût danin, FSA hnuaiah hian Mizoram sorkarin thla khatah buhfai metric ton 6,600 a hmu dawn. Hetih lai hian, FSA hnuaia Mizoramin thla khata buhfai a mamawh tura chhût chu metric ton 3804.41 a nih avangin, metric ton 2795.59 a chuang thei ang. FSA-in a huamte'n buhfai an lei theih chin kham a nih loh chuan, a chuang metric ton 2795.59 aṭanga an mamawh khawp pek theih an inbeisei a ni.
FSA-in a huam ve lohte buhfai lei dan tur chungchang zawhna chhangin, FCSCA department hotute chuan, "Sorkarin rua­hman­na a siam turah kan ngai. Tun dinhmunah chuan engtin nge an kalpui dawn tih kan la hre lo," an ti.
Supply department chhût dan chuan, Mizoramah mihring 15,91,533 awm tura beisei a ni a, FSA-in a huam loh mi 8,85,237 an awm ang.
FSA-in a huam lohte chu khawpui (urban area)-a cheng mi 4,62,671 leh thingtlang (rural area)-a cheng mi 4,22,566 an ni. Tuna ration buhfai sem mek dan, thla khatah khawpuiah kg. 4 leh thingtlangah kg. 8 anga chhûtin, FSA-in a huam lohte tan thla khatah buhfai metric ton 5391.64 mamawh a ni.
FSA hi hman a nih chuan sorkar laipuiin buhfai phurh man, labour man leh retailer-te hlawh tur a tum tur a ni a; mahse, buhfai phurh man, labour man leh retailer-te hlawh tura a ruahman zat Mizoram sorkar hnenah sorkar laipuiin a la hriattir lo.
Hetih lai hian, FCSCA de­part­ment ngenna anga ration card sorkara pe lut (surrender) mi 52 an awm tawh a; Supply department chuan chief secretary, head of department leh district commissioner-te hnenah lehkha thawnin, an hnena ration card thehluh theih tura ruahmanna siam turin an ngen a ni.

FSA hman a nih chuan -
. A huam tur zat mi 7,06,296
. A huam loh tura chhût mi 8,85,237
. Buhfai dawn tur metric ton 6,600
. Buhfai mamawh zat metric ton 3,804.41
. A huam lohte buhfai mamawh tura chhût metric ton 5,391.64