KHAWTHLIR
Tui pump thei
Aizawl khawpui châwmtu, Greater Aizawl Water Supply, Tlawng aṭanga tui pump-na atana electric lakna 33 KVline pahnih chhia chu siam ṭhat a ni tawh a, Nilaini zan aṭang khan tui pump chhunzawm leh a ni.
Tuiah tla hlum
April 22, 2015 chhun khan Chhawrtui khuaah tuizém atana lei laih khuara tui tlingah Lalrinmuana (6) s/o Hmangaihliana, Chhawrtui a tla hlum. Thu dawn danin, Lalrinmuana hi a ṭhiante nen lei laih khuara tui tling bul velah uláwng an veh a, chesualin, tui tlingah chuan a tla lut ta a ni.
MPS siksawi
Mizoram Police Service officer mi 18, selection grade pariat leh senior grade sawmte chu an awmna siksawi an ni.
Plan thlirho
Nimin khan Lawngtlai DC conference hall-ah Integrated District Plan Proposal-te thlirhona neih a ni a; Lawngtlai district-a MLA pathum - C Ngunlianchunga, Dr BD Chakma leh H Zothangliana-te bakah, LADC CEM V Zirsanga ten an hmanpui.
In kâng ral
April 22, 2015 zan dar 9:00 vel khan Chhawrtui khuaa Rothangpuia in, Assam type a kâng a, bungrua chuh hman lohin a kâng ral. Thu dawn danin, Rothangpuia inah hian an fapa Laltlanmawia (11) chiah awmin, power supply a awm loh avangin mombati a chhi a, a bati chhit chu a mutthilhsan avangin kângmei a chhuak ta niin an ngai.
Hun pawtsei
April 30, 2015-a V/C inthlan tura Biate khuaa MNF party candidate Denghmingliana chu April 20, 2015 khan a thi a; State Election Commission (SEC) chuan Denghmingliana aiawh tur ruatna hun nimin thleng khan a hawng.