Best Green State-ah Mizoram thlang

Travel & Leisure India and South Asia chuan India ram pum huapa survey an neihnaah ram ngaw leh hring ṭhatna ber (Best Green State)-ah Mizoram an thlang.

Mizoram sorkar chuan thuchhuah siamin, Mizoramin Best Green State Award a dawng chu an ngaihhlut thu a tarlang a, "Tun aia nasa zawka zin mite hîp tuma ṭan lain, khualzin tam zawk hîp luh ngei beisei a ni. He award hian sum leh pai keng tel lo mah se, khawvel zau zawkah Mizoram pho langtu a nih avangin social media (page) lamah pawh Mizoram Tourism hian tlawhtu a ngah phah hle," an ti.

Sorkar thuchhuah tarlan danin, Best Green State-a Mizoram an thlan chhan chu, ram hring mawina mai bakah, Tourism department-in tun hnaia Responsible Tourism Policy a chhuah vang a ni.

Responsible Tourism Policy tharah hian tun hmaa la awm ngai lo, khualzin mite tlawh fo ṭhin hmunhma vawn thianghlim te, ramngaw, thing leh mau chereu tur vèn te, ramngaw tichhe thei tur ram dang aṭanga thing leh mau lam chi lâk luh khapte bakah, Mizoram páwna naubán lak chhuah khapte leh thil dang tam tak a tel a ni.