Telecom service tihṭhat dan tur sawiho

Mizorama Telecom service tihchangtlunna tur ngaihtuahin Nilaini khan chief minister Lal Thanhawla hoin, a pisaah Power & Electri­city secretary RK Gup­ta, ICT secretary C Lal­hmachhuana, se­cretary to chief minister Lalram Thanga, BSNL NE-I Circle CGM DP Singh leh official pawimawh dangte an ṭhukhawm.

Lal Thanhawla chuan, Mizoram chu hmarchhak state zinga information tecnology lama hmasawn leh changtlung ber a nih thei thu sawiin, "Cor­ruption dona atan IT a ṭang­kai thei hle a, chumi atana e-Governance pro­ject hrang hrang pawh chak taka kalpui a ni. Taxation department-in online tax payment an siam hnuah tax collection pawh a pung nasa hle," a ti.

Hmun kilkhâwr zawk leh ramri hnaihahte mobile service ṭha neih a ṭul thu sawiin, Chief Minister chuan BSNL hotute chu ṭan la turin a ngen a ni.

BSNL NE-I Circle CGM DP Singh chuan, Aizawl aṭanga Kolkata BSNL direct connection, 10 Gbps chu thla hnih chhunga peih hman a nih tur thu a sawi a, "Hei hian BSNL mobile service mai bakah internet broadband service a tihṭhat phah tura ngaih a ni," a ti.

Meeting-ah hian dis­trict hrang hranga Telecom service ṭha zawk neihna turin Optical Fibre Ground Wire power line-a thlun dan tur chungchangte sawiho a ni.