RMSA laboratory attendant leh clerk-te CMO gate aṭangin police-in an nawr kiang

RMSA hnuaia laboratory attendant leh clerk-te chu chhawr chhunzawm phûtin nimin khan CMO gate páwnah an pung khawm a, police-in an nawr kiang.

Nimin chhun khan Aizawl Press Club-ah thuthar thehdarhtute kâwm nghalin, chhawr leh phûtna atan chaw an nghei dawn tih an sawi a, "A ṭul dan azirin Court-ah pawh kan kal ang," an ti.

RMSA Laboratory Attendant & Clerk Joint Action Committee (RMSA LA&CJAC) hruaitute chuan, April, 2015-a laboratory attendant leh clerk 366-te chu sorkar laipuiin an hlawh tur leh hamṭhatna dangte state sorkar pek tawh tura a tih thu sawiin, "Hei hi Mizoram sorkarin a tum ve theih si loh avangin keini mi 366-te chu kan hna ṭanga bàn nghal tawp kan ni," an ti a; bàn an nih avangin hrehawm an tih tak zet thu an sawi.

RMSA LA&CJAC hruaitute chuan, Mizoram RMSA leh Mizoram Rural Bank-in April 2017 thleng awh tur agreement an ziah avangin mi tam takin loan an pûk tih sawiin, "Agreement thleng tal hi chu min chhawr se loan pawh kan rûl thei ang a, chu bakah hna dang zawnna hun pawh a awm dawn a ni," an ti.

Laboratory attendant-te'n class-te an lak ve ṭhin thu sawiin LA&CJAC hruaitute chuan, "Zirtirtu indaih lohna vangin a theih ang angin class kan la ve ṭhin. Zirtirtu indaih lohna phuhrûkna atan pawh kan ṭangkai ve hle," an ti a; clerk-te pawh sikul thil pawimawh hrang hrang khawihtu an nih avangin an awm loh chuan sikulin buaina a tawh phah tur thu an sawi.

LA&CJAC hruaitute chuan an harsatna tawh sorkarin a bengkhawn ṭha duh lo tih sawiin, "Kan ram hruaitu nu leh pa anga kan ngaihte'n min kuangkuah duh lo lui a, fahrah ang maiin min en a ni," an ti.

RMSA LA&CJAC hruaitute chuan, state tam takah chuan sorkar laipui aṭangin pawisa dawng lo mah se, laboratory attendant leh clerk-te chu state sorkarin a chhawr zui niin an sawi bawk.