Huntiam chhunga hna thawk zo lote Thlak dan zawn mai a tha : Lal Thanzara

PWD enkawltu Lal Thanzara chuan, hun tiam chhunga hna thawh zawh a nih loh chuan a nghawng mipuite an zahawm avangin, a ṭul chuan contractor-te thlak dan kawng zawn mai a ṭhat thu a sawi.

Pradhan Mantri Gram Sadak Yojana (PMGSY) hmanga Mizoram PWD-in hma a lak dan thlirletna, nimina PWD engineer-in-chief pisa conference hall-a neihah thu sawiin, Lal Thanzara chuan, "Mizoram hmun hrang hranga PMGSY scheme hrang hrang kalpui mekah hmun tam takah hna tluang taka kalpui a nih laiin hmun ṭhenkhatah harsatna chi hrang hrang PWD-in a tâwk ṭhin. Harsatna a awmin, contractor-te mawhpuh mai loa uluk lehzuala an hna thawh dan vil ṭhin a pawimawh," a ti.

Lal Thanzara chuan, kawngpui siam, in sak leh leilâwn siam hnate chu neitu rilru pu chunga ṭha taka hlen chhuak zel tura inpek a ṭul thu sawiin, "Hmasawnna ruhrel hna thawhna tur PWD kutah sum tam tak awm ṭhin hi thlêmna a ni thei," a ti a; kut tling loa sum neihin nun hlimna a thlen lo a, taksa leh thlarau tan chhiatna a thlen zawk ṭhin tih a sawi.

PWD secretary Lalram Thanga pawhin thu sawiin, "Tlang ramah chuan kawngpui chauh inkalpawhna kan neih avangin kawngpui ṭha neih a pawimawh lehzual. Mizoram hi thingtlang inkalpawhna kawngpui nei ṭha pawl tak kan ni," a ti.

Meeting-ah hian PWD E-in-C R Vanlaltluanga'n Mizoram puma PMSGSY kalpui dan a tarlang a; PMGSY hnuaia hna thawk mek enkawltu EE-ten an hna enkawl mekte an sawifiah bawk.