Inhlawhna siam thei loah sorkar puh

MNF party chuan thuchhuah siamin, MGNREGA hnuaiah Mizoram sorkarin inhlawhna a siam hlei thei tawh lo niin an tarlang a, "Mizoram sorkar inthlahdah vang leh ‘kan VIP’ an tih ṭhin miretheite an ngaihsak tak tak lohzia lanna a ni," an ti.

MNF chuan, "MGNREGA hnuaia ni 100 inhlawhna kalpui mumal a nih loh avang leh MNF sorkarin BPL-te inhlawhna a siam ṭhin chu Congress sorkarin a tihtawp avangin khawpui leh thingtlang miretheite an mangang tak zet a ni," an ti.

MNF tarlan danin, sorkar kum liam ta, 2014-15 chhung khan MGNREGA hnuaiah Aizawl district-ah ni 25, Lunglei district-ah ni 19, Saiha district-ah ni 19, Champhai district-ah ni 20, Kolasib district-ah ni 20, Serchhip district-ah ni 21, Lawngtlai district-ah ni 18 leh Mamit district-ah ni 19 inhlawhna siam a ni.

MNF chuan, MGNREGA hnuaia ni 100 inhlawhna senso tur chu sorkar laipuia Ministry of Rural Development-in 90% a tum a, state sorkar­in 10% a tum ve thung tih sawiin, "Mizoram sorkar­in a tum ve tur 10% lek a ngaihthah ṭhin avangin miretheite’n ei bél bera an lo neih ṭhin ni 100 inhlawhnaah inhlawhna an siam hlei thei lo ṭhin a ni," an ti a; Congress sorkar chu nawm chen zel an tum a nih pawhin, miretheite chaw bêl tibaw zawnga khawsa lo turin an ràwn a ni.