INC MDC palite MNF-ah lawm lut

Lai Autonomous District Council (LADC)-a Congress party MDC zinga pali, tun hnaia MNF party zawmtute chu nimin khan MNF vice president Lalthleng­liana'n a lawm lut.

Lawm luhna inkhawm hi Bungkawn, Aizawla Lalthlengliana inah neih a ni a; MNF Vice President chuan, Lai ramah Congress an tho kâng tawh dawn lo nia sawiin, "Lai ram Congress hian Congress an tho kâng dawn lo tih an hmu chiang em em a ni," a ti a, Central-ah Congress an tluchhe zel a, BJP pawh lian angin lang mah se, Mizoramah chuan mipui rilruah an tla na thei lo niin a sawi.

Lalthlengliana chuan, 'MNF-a lut duh apiang chu kan lawm lut zel ang' an lo tih tawh thu sawiin, "Tuna MDC pariat, BJP zawmtute pawh hi inchhir hun an nei ang a, MNF zawm turin kan sáwm a ni," a ti. 

Lawm luh thar zinga mi V Zirsanga, LADC sorkara CEM leh Chairman ni ve ve tawh chuan, nikum aṭangin MNF zawm dan kawng an zawn tawh thu a sawi a, "Congress-ah beisei tur a awm tawh lo. Roreltute hi Pathian ruat an nih angin, MNF-ah hian lâwm taka thawk turin kan lo lut a ni," tiin, LADC MDC inthlan awm turah pawh MNF chu an chak ngei dawn niin a sawi.

Congress party aṭanga thlan tlin MDC pali, MNF zawmtute chu - V Zirsanga (Paithar bial), VL Hmuaka (Lawngtlai Vengpui bial), Lallawmsanga Apetow (Sekulh bial) leh ST Laldailova (Sangau South bial)-te an ni.

LADC-ah hian MDC 25 an awm a, kum 2015-a inthlanpuiah INC-in seat 16 lain sorkarna an siam a, MNF-in seat pariat leh independent-in seat pakhat an la bawk a; independent MDC hian a hnuah INC a zawm.

MNF hian an party zawm thar mi palite nen MDC 12 an nei ta a; sorkar lai INC MDC zinga pariat dangte'n October 16 khan BJP zawma BJP Legislature Party an din avangin INC MDC chu panga chiah an nei tawh. Tun dinhmunah MNF-in MDC 12, BJP-in 8 leh INC-in 5 an nei mek a; BJP leh INC-te'n (MDC 13) sorkarna an chelh mek a ni.