Thisen petute tihnual lo turin MNYF chah

Congress party ṭhalaite chuan, damdawi-in hrang hranga blood bank-te'n tun hnaiah damlo tan thisen an nei tam tâwk lo a, thisen mamawhna a san viau lai a ni tih an sawi a; hetih lai hian MNF ṭhalaite chu thisen petute tihnual zawnga thu nei lo turin an chah.

MPYCC chuan, thisen mamawhtute harsatna sutkian dan tur ngaihtuaha mipui ṭan tlan a ngaih lai taka thisen petute tihnual zawnga thuchhuah siam ṭhinah MNYF an puh a, "MNF ṭhalaite hian mi tlawmngaite tilunghnûr zawng hian thu sawi fo tawh lo se," an ti a; thisen pek chungchang chu political party anga inbeihna chi a nih loh thu leh khawtlang leh mipuite ṭan rual a ngaihna chi a nih thu sawiin, sorkar ṭawiawm thiam turin MNYF-te an ngen a ni.

MPYCC chuan, thisen sawngbawlna man lak a nih vanga thisen petute tlem ta anga MNF ṭhalaite'n an sawi zui zel a nih chuan, a thlawna thisen petu an lo tlem a, damlote mamawh pek tur a awm lo a nih chuan MNF ṭhalaite mawhphurha an ngaih dawn thu an sawi a; "Blood bank-a thisen tlem chang a awm fo a, tlawmngaia thisen pe ṭhintute hi an thisen hlu tak mi dang nunna atan theihtawp chhuah zel turin kan ngen a ni," an ti.