Khualzin hîp theih dan tur sawiho

Mizoram Tourism Promotion Committee (MTPC) chu Ningani khan an chairman, Tourism secretary Manisha Saxena hoin a pisaah an ṭhukhawm a, Aizawl hmun remchang laiah thla tin vawi khat Cultural Evening neih ṭhin ni se, an ti.

Manisha Saxena chuan, tourism-in hma a sâwn theih nan Mizoram Tourism Promotion Committee din a nih thu a sawi a, "Tourism department chauh ni lo, department dangte nen ṭanghoa khualzin mite hîp theih dan tur kan ngaihtuah tlân a hun. Mizoram hi khualzin hîp turin a ramin a zir tâwk hle a ni," a ti.

Meeting-ah hian Art & Culture department hnuaia museum leh thil dangte khualzinte en tlaka tihchangtlun te, souvenir shop buatsaih te, Horticulture department-in pangpar leh thlai huan changtlung tak zin mite tlawh turin buatsaih se tihte leh, Industries leh Tourism department-in kut themthiam thil phochhuahna hmun buatsaih se tihte an rel a ni.