KHAWTHLIR

Health secretary H Lalengmawia’n Covid-19 a vei tawh lo tih Ningani zan khan finfiah a ni. H Lalengmawia chuan, hripui a vei tih hriat a nih aṭanga ni 14 a ral hma chuan sorkar dan angin a inkhung rih dawn tih Vanglaini a hrilh. 

YMA, Phulpui Branch chuan nimin khan an khaw tlang, Zawlpala Thlàntlangah an din champha vawi 85-na an lawm a, Art & Culture deputy director Lalchuailova’n hman­­puiin,  Zawlpala Thlantlang an tifai. Phulpui YMA chuan, Covid-19 vangin Zawlpala Thlantlang chu tlawh phal a ni rih lo tih an tarlang.

Association for Voluntary Blood Donation (AVBD) Gen.Hqrs chuan, AVBD office bearer inthlan hun tawh mah se, Covid-19 hripui léng vanga inthlan theih a nih loh avangin, office bearer ṭang laite mawhphurhna an keng rih dawn a, Executive Committee member pawh a ngai an la ni zel rih dawn tih an tarlang. Hripui léng dinhmun azirin inthlan hun la ruat leh a ni ang.

National Integrated Forum of Artists & Activists (NIFAA), Siaha district chuan nimin  MTP Gen.Hqrs pisa, Siahaah India rama NIFAA kum 20 tlin lawmna pualin an district-a Covid-19 donaa thawk ṭha - mimal leh páwlte hnenah chawimawina an hlan. Kum 2020 chhunga thing ṭiak 20 aia tam phun mimal, páwl leh kohhrante hnenah chawimawina an hlân nghal bawk.

Serchhip Khawtetlanga Judicial Officers’ Residential Complex chu nimin khan Gauhati High Court-a judge pahnih - Michael Zothankhuma leh Nelson Sailo ten an hawng. Complex-ah hian quarters grade I, II leh III-te sak a ni a, sum ruahman zat chu nuai 422.70 a ni. August 1, 2018-ah sak hna ṭan a ni a, kumin February 1-ah sak zawh a ni.

Covid-19 dona atan Chief Minister‘s Relief Fund (CMRF)-ah nimin thleng khan cheng nuai 2,129 a lut tawh. CM Relief Fund hi Committee on Utilization of CM Relief Fund for Covid-19 ten an rel angin hman ṭhin a ni a, cheng nuai 1,934 hman tawh niin, la hman loh cheng nuai 195 a awm.

Nimin khan Lungleia LAD conference hall-ah VC president leh treasurer-te tan State Finance Commission leh sum vawn leh enkawl chungchang zirna thawh khatna buatsaih a ni a, Thorang leh West Tuipui biala VC president leh VC treasurer-te an tel. He hun hi Lunglei DRDA project director K Lalrohlua‘n a hmanpui a ni.