Thapui thawha ruihhlo kan do a ngai - Home Minister

Home minister K Sapdanga chuan September 28, Inrinni khan Khawzawl SP pisa a tlawh a; thapui thawha ruihhlo do a ngaih thu a sawi.

Tunlaiah social media a chak a, thu dik leh dik lo hriat hran har khawpin thil thehdarh a ni ṭhin tih sawiin Home Minister chuan, "Hei hian mipuiah ṭul miah loa buaina thlen cháng a nei ṭhin. Police-te pawh tunlaia kan buaipui ber chu ruihhlo leh khuva a ni tawp mai a, khawtlang harsatna leh buainate chu khawih ve ṭhin bawk mah ila, ruihhloin kan ṭhalaite nun nasa taka a tihchhiat avangin thapui thawha kan do a ngai a ni," a ti.

K Sapdanga chuan, police chakna ringawt chuan ruihhlo vên a harsat thu sawiin, "NGO hrang hrangte thawhpui thiam a pawimawh. Hmalakna ṭha tak pawh hi mipui thlâwpna tel lo chuan hlawhtlin a har em em," a ti a, thawhpui nuam tak leh thawhpui châkawm tak ni zel turin hmun hrang hranga police-te a chah.

Home Minister chuan, kuhva chu ngaihtuah mai chuan sual ni loa ngaih theih a nih thu a sawi rualin, dan loa kuhva tawlhin khawtlang nun a tihbuai thu a sawi a, "Kan rilru sûkthlêk leh kan ram economy thlenga a nghawng avangin theih­tawpa do a ngai. Kan rama kuhva chingtute thlenga harsatna a siam avangin theihtawpa kan do tlan a ngai a ni," a ti.

Dan leh hrai kenkawh chu police leh sorkar kuta dah ngawt a theih loh tih sawiin K Sapdanga chuan, "Mi zawng zawng thawhhona tur a ni a, inbiakpawh zung zung a pawimawh," a ti a; harsatna awmte chingfel zung zung thei tur chuan ṭha taka inbiakpawh a, thawhhona tichak zel tura inkungkaihna ṭha siam a ngaih thu a sawi.