Tleirawl zan lên chungchangah CYMA-in hma la turin an ngen

Central YMA chuan tun hnai khan YMA sub-headquarters, group leh branch-te hnenah lehkha thawnin, naupang leh tleirawl zana lêng chhuakin sualna a tipunlun nia an hriat avangin a ṭul anga hma la turin an ngen.

CYMA chuan, naupang leh tleirawlte ṭul leh pawimawh ni loa zan lama an lêng ṭhin chu sual punlunna bul nia a lan thu an tarlang a, "Khawtlangah rah ṭha lo tak a chhuah ṭhin. Ṭul loa mi pawi khawihna leh insual rawnte kan ching ta zel hi a pawi tak zet. Hemi chungchangah mahni huam chhung ṭheuhah ṭan la tur leh khawtlanga sualna pung chho zel do kawnga theihtawp chhuaha ṭan la thar turin kan inngen a ni," an ti.

October 24, 2024 (Ningani)-a R Dengṭhuama Indoor Stadium-a YMA Rorel Inkhawm vawi 4-na an neih tura budget ruahman Rs 9,00,800 chu sorkar leh mi dang puihna tel loin, YMA sum aṭanga hman ni se, tiin CYMA chuan an rel a ni.