World Rabies Day hman a ni

September 28 kha World Rabies Day a ni a, Mizoram hmun ṭhenkhatah hman niin, ran eng emaw zat hnenah hri danna (vaccine) pek a ni. Kumina World Rabies Day thupui chu 'Breaking rabies boundaries' tih a ni.

World Rabies Day hi Health & Family Welfare department pawhin Hotel Royale Lalawi-ah an hmang a, HFW minister Lalrinpuii'n hmanpuiin, kum 2030 ral hmaa ui â hri ûmbo tura hmalakna 'State Action Plan for Rabies Elimination' (SAPRE) a tlangzarh.

Health Minister chuan, Mizote'n ran an ngainat thu sawiin, "Khawtlang nunphung, eizawnna leh ni tin khawsaknaah rante'n hmun pawimawh tak an chang. Mizoramah ui thlah (breed) hrang hrang a awm zel a, chhungkaw member ang hiala kan ngaih ni mah se, pawn lam mi tana hlauhawm leh harsatna thlentu a nih loh nan enkawlnaah ṭan rual a ngai a, a bikin ui huaisar leh kawlhte ven uluk a ngai," a ti.

Damdawi-in hrang hrangah ui seh vanga hri danna la tam tak an awm thu sawiin Lalrinpuii chuan, "Ui â seh vangin khawvel pumah kum tin mi 56,000 chuang an thi ṭhin a, India ramah kum tin mi 20,000 chuangin an thihpui ṭhin. WHO, FAO leh OIE-te'n kum 2030 ral hma ngeia ui seh aṭanga natna kai vanga thihna thleng thei tihreh tuma hma a lakna tihlawhtling turin NHM hnuaiah National Rabies Control Programme (NRCP) kalpui a ni hi a lawmawm," a ti a; ui seh vanga mihring thihna um bo turin sorkar leh pawl hrang hrang thawhho ṭhat a ṭul thu a sawi.

Mizoram State Veterinary Council, Indian Veterinary Association leh All Mizo Veterinary Medical Student Association-te chuan Khatlaa Veterinary Polyclinic Hospital, Durtlanga Veterinary Dispensary leh Ramrikawna Animal Feed Plant-ahte a rualin World Rabies Day an hmang a; hmun pathumah hian a thlawnin anti-rabies vaccine dose 500 pek a ni.

Veterinary Polyclinic Hospital-a World Rabies Day hmannaah AH&Vety director Dr R Zothanmawi chuan, ran hri upa tawh tak chu a venna damdawi leh hmanrua ṭha zawkte hmanga chhut chah theih a nih thu sawiin, "AH&Vety department chuan anti-rabies vaccine a pe chhuak ṭhin a, he hri vennaah hian theihtawp a chhuah ṭhin. Kan ran vulhte ṭha taka enkawlin, a hun takah vaccine kan pe ṭhin tur a ni," a ti.

College of Veterinary Science & Animal Husbandary (CVScAH) pawhin Animal Health Centre, Ramhlun North-ah World Rabies Day an hmang a, CVScAH aṭangin zirtitrtu pariat, thawktu dang pahnih leh post graduate zirlai pariat an tel.

CVScAH-in World Rabies Day an hmannaah hian Ramhlun North Local Council huam chhunga ran 109 - ui 78 leh zawhte 31 hnenah anti-rabies vaccine pek a ni. CVScAH hian kum 2013 aṭang khan kum tin Rabbies Day an hmang ṭhin.

World Rabies Day hi Louis Pasteur thih champha September 28-ah hman ṭhin niin, kum 2007 aṭangin khawvel ram hrang hrangah hman ṭhin a ni.