Thubuai leh jail kaihhnawih sawiho

Aizawl judicial district huam chhunga district court hotu te, district administration leh police hotute chu September 27, 2024 khan Aizawl District Court meeting room-ah an ṭhukhawm a, jail tihchangtlun chungchang leh criminal law thar hmanga court leh police thawhho dan an sawiho.

Ṭhutkhawm hi Gauhati High Court-in August 20, 2013-a notification a tihchhuahin thla tin ṭhukhawm tura a hriattir anga huaihawt a ni a; jail thawm ṭhat te, jail-a medical officer (doctor) dah belh, hnu chhui leh court-a thubuai kalpui zel dan, criminal law thar pathum chungchang te, thubuai kaihhnawiha mi dap (search & seizure) leh finfiahna - electronic evidence lak dante sawiho a ni.

Aizawl SP Rahool Alwal-a'n e-Sakshya application chungchang a sawifiah a; court leh police-te thawhho dan leh DC-te nena thawhho chungchangte sawi a ni bawk.

Ṭhutkhawm hi Aizawl district judge Helen Dawngliani'n a kaihruai a, Aizawl chief judicial magistrate Lalrochami Ralte leh Aizawl judicial district huam chhung - Aizawl, Mamit, Serchhip, Kolasib leh Saitual district-a DC leh SP aiawhte an tel a ni.