Bawng talh lo tura beihpui thlak tumtute an kîr leh nghal

Hindu pawl pakhat, Shan-karacharya of Jyotirmath Peeth mi leh sate chu Mizoramah bawng talh lo tura beihpui thlak tumin September 27, 2024 khan Lengpui Airport-ah an lo ṭum a, mahse, an dodal avangin an kîr leh nghal niin MZP chuan a tarlang.

MZP chuan, Shankara-charya of Jyotirmath Peeth mi leh sate'n hmarchhak state hrang hrangah bawng talh lo tura beihpui thlak an tum a, chu chu duh loin, dodalna thuchhuah September 13, 2024-ah an lo tihchhuah tawh thu an tarlang a, "September 27 khan he pawlte hi Mizoram lo kal tumin, private thlawhna hmangin Lengpui Airport an lo ṭum a, zirlai pawlte'n kan duh lohzia thuchhuah kan siam avang leh kan dodal dawn tih an hriat avangin an thlawk let leh a ni," an ti.