Ruihhlo do turin ngawrh leh zuala duty rêl
Serchhip District Task Force on Ruihhlo Do chu an chairman Paul L Khuma, bawrhsap kaihhruaiin September 27, 2024 khan an ṭhukhawm a, Serchhipa ruihhlo ngaite kal tamna hmun nia ngaihte leh ruihhlo zuarte awmna hmun nia ngaih ṭhenkhatah ngawrh lehzuala duty an rêl.
Ṭhutkhawmah hian tun hnaia Serchhip veng pakhata ruihhlo ngai nia hriat ṭhalai eng emaw zat a ruala kal lai video social media-a darh chungchang leh hmalak zui dan tur sawiho a ni a; sorkara dan kengkawhtute bakah, tlawmngai pawlte leh kohhrante ṭanho a pawimawh thu an sawi.
Additional SP Saidingliana Sailo kaihhruai Working Committee din nghal a ni a; Serchhip district-a Police leh Excise & Narcotics-te leh a remchan dan angin YMA branch hrang hrangte leh VDP-te nen thawkho a, hunbi neia nasa lehzuala duty ni se, an ti. Ruihhlo ngaite kal tamna hmun nia ngaihte leh ruihhlo zuarte awmna hmun nia ngaih ṭhenkhatah ngawrh lehzuala duty an rêl a; Serchhipa ruihhlo lut tihtlem (supply reduction)-na turin nasa lehzualin ṭan lak ni se, an ti bawk.
Serchhip Bawrhsap chuan, Serchhip khawpuiah ṭhalai eng emaw zat ruihhlo bâwihah an táng tih sawiin, "Ruihhlo zuar ru eng emaw zat an awm nia a lan avangin ṭan lak nasat zual a ngai. Rei lo tê atan chauha ruihhlo tihrêm hi a tâwk lo a, engtin nge a rêm hlen theih ang tih ngaihtuah a pawimawh. Chutihrualin, ni khat thil thua rêl fel chi a nih loh avangin tun dinhmunah eng nge kan tih theih hmasak tih ngaihtuah a ṭul," a ti.
Excise leh Police-te hnathawh ṭhat avangin ruihhlo zuar eng emaw zat man an nih thu sawiin Bawrhsap chuan, "Hei vang hian tunhnaiah ruihhlo a váng niin a lang a, thâ thlah loa ṭan kan lak zel a ṭul. Ruihlo bâwiha tángte hi tute nge an nih tih zawng chhuakin, an sim theih nana ṭanpui dan tur ngaihtuah kan tum dawn a ni," a ti a; ruihhlo dona turin Nasha Mukt Bharat Abhiyan-in ruahmanna mumal tak a siam thu leh chak taka hmalak nghal a nih tur thu a sawi.
Ṭhutkhawmah hian Task Force member-te bakah, kohhran hruaitu te, YMA sub-headquarters hruaitu te, Serchhip Chhimveng leh Kawnpui South YMA hruaitute, VC leh VDP hruaitute an tel a ni.