Ruihhlo do kawngzawh huaihawt

YMA, Tuivamit Branch chuan September 28, Inrinni zing khan an vengah 'Ruihhlo do kawngzawh' an huaihawt a, Excise & Narcotics minister Lalnghinglova Hmar-in hman-puiin, khawtlang ralmuang leh hmasawn siam turin ruihhlo laka fihlim khawtlang siam hmasak a ṭul thu a sawi.

Lalnghinglova Hmar chuan, ruihhlo duh loh lantirna kawngzawh chuan khawtlanga ruihhlo zalen leh hluar lutuk tur a vên bakah, ṭhalaite hnenah ruihhlo ti lo tura thuchah pawimawh tak thehdarhna a nih thu a sawi a, "Khawtlang ralmuang leh hmasawn siam tur chuan ruihhlo laka fihlim khawtlang siam hmasak a ṭul. Ruihhlo hi ram leh hnam hmasawnna tiṭhuanawptu a ni a, ruihhlo do hlawhtling tur chuan sorkar hmalakna piah lamah tlawmngai pawlte ṭhahnemngaihna a pawimawh," a ti.

Kohhran leh khawtlangah ruihhlo ṭhat lohna inzirtir tam a pawimawh thu sawiin Minister chuan, "Khawtlang anga ruihhlo ngaite enkawl leh zirtirna ṭha pea hmalak a ṭul hle a ni," a ti bawk.

Kawngzawh puala in-khawm tawi hi Tuivamit YMA president Biaksang-zuala'n a kaihruai a, Central YMA vice president Prof. Lalnuntluanga leh Tuivamit Local Council chairman H Zakima te pawhin thu an sawi.