Tuialhthei man tihhniam loh chuan truck-te'n buhfai phurh loh tum

Mizoram Truck Owners Association (MTOA) chuan thuchhuah siamin, sorkarin tuialhthei man a tihhniam loh chuan rei tak buhfai an phurh theih dawn loh thu an tarlang.

MTOA chuan, tun hnaiah diesel man litre khatah Rs 8 dáwna a pun thu tarlangin, "Motor lian hmanga eizawngte min nghawng nasa em em a, FCI leh Mizoram sorkara kan buhfai phurh man (agreement) hi oil tlâwm laia siam vek a nih avangin kan dinhmun a khirh ta hle," an ti.

Tuialhthei man tihniam turin Chief Minister leh Minister hnenah dilna an thlen tawh thu tarlangin MTOA chuan, "Beiseina sang tak nen kan thlir mek a ni. Kan beisei anga oil man tihhniam a nih loh chuan buhfai hi rei kan phur thei tawh dawn lo," an ti a; buhfai an phurh theih loh avanga harsatna a thleng a nih pawhin, hrethiam turin mipui an ngen a ni.