Covid-19 vei hmuh thar 26 zingah Inthlan kaihhnawiha kái 4 an awm

September 24, Ningania Covid-19 vei hmuh chhuah mi 26 zingah Mizoram chhunga kái chhâwng (local positive contact) pasarih an awm a, chu'ng zinga pali chu local council inthlan kaihhnawiha swab sample endik leh hripui kai nia hriat a ni.

Mizoram chhunga hripui kái chhâwng mi pasarihte hi September 17-a swab sample lak vek an ni a; Chaltlang venga mipa kum 50 mi chu Ramhlun South LC inthlana duty a ni a, inthlana a duty vanga sample lak niin, lakna hmun pawh Ramhlun South a nih thu, Chaltlang Local Task Force hruaitute chuan an sawi.

Chanmari vengah Covid-19 positive hmuh thar pali an awm a, mipa pathum, kum 18, 22 leh 47-a upate leh hmeichhia kum 46 mi an ni. An zinga pahnih chu local council inthlana duty leh chumi vanga swab sample test an ni a; pahnih dang chu thil zuar ṭhin, Electric Veng aṭanga bungrua an lâknaah hripui vei nen an inhnim hnaih vanga kai an nia ngaih a ni.

Chawnpui vengah Covid-19 vei hmei­chhia pakhat, kum 46 mi hmuh chhuah thar a ni a; ani hi District Election Office-a thawk leh a thawhpuite aṭanga kai nia an hriat thu, Chawnpui LTF Secretary chuan a sawi.

Tuithiang vengah pawh hripui vei mipa kum 19 mi hmuh thar a ni a, ani hi Tuithiang Local Council inthlana vote chhiartu Covid-19 positive tih hmuh chhuah tawhte secondary contact a ni. An venga Covid-19 positive contact aṭanga kai a nih theih rualin, hmun dang aṭanga kai a nih an rin zawk mah thu sawiin LTF hruaitute chuan, "Amah hi secondary contact a ni a, first contact - a pa a negative thung.

Bawngkawn leh Durtlang lamahte pawh a kal avangin hmun dang aṭanga kai a ni thei a, insawiselna nei deuha a insawi vanga swab sample test a ni," an ti.