KHAWTHLIR

War Memorial tifai

Swachhata Hi Seva hnuaia faina beihpui thlak kalpui mekah September 28, Inrinni khan Urban Development & Poverty Alleviation department, Lunglei Municipal Council, Sainik Welfare & Resettlement office leh Mizoram Ex-Services League Sub-Headquarters-te ṭangho chuan faina hnatlang an huaihawt a; Lungleia awm, indonaa ram tana nun hlante hriatrengna lungphun, War Memorial hmunhma leh a chhehvel an tifai a ni.

Transformer hlan

Lunglei North bialtu MLA V Malsawmtluanga chuan September 28, Inrinni khan a bial chhung Zote South hnenah transformer 250KVA a hlan. Zote South khua hian transformer 100KVA an hman mek chu a chhiat avangin September 15, 2024 zan aṭangin kawlphetha an nei tawh lo a, bialtu MLA-in hma lain, MLA fund-a rulh leh turin transformer a hlan a ni.

DC hoin ṭhukhawm

September 28, Inrinni khan Sampoornata Abhiyan for Reiek Aspirational Block chungchangah Mamit bawrhsap Jacob Lalawmpuia hoin harsatna leh hmalakna tur chungchang sawiho a ni. Bawrhsap chuan, hmasawnna hna thawk turin official-te leh khawtlang hruaitute thawhhona ṭha a pawimawh tih sawiin, thawhhona leh inpawh tlannain ram hmasawnna a thlen thei a ni tih hre chunga hmala turin kalkhawmte a chah.

Lirthei chesualah thi

Nimin zing dar 8:15 vel khan Champhai aṭanga Aizawl pana tlan Creta car chu Seling daiah a chesual a, car-a chuang mi pakhat a thi. Thu dawn danin, car-ah hian mi pathum an chuang a, C Lalhruaimawia (32) h/o K Lalparmawii, Lunglei, tuna Bethlehem Veng, Aizawla khawsa mek chu chetsualna hmunah a thi. Mi dang pahnih chu Thingsulthliah damdawi-ina enkawl an nih hnuah chhuahtir an ni a, ngaihtuah awm an ni lo.