Duty laia police thite sûn an ni
Nimin, October 21 kha India ramah police, duty laia thite hriatrengna ni, Police Commemoration Day a ni a, India ram hmun hrang hrangah hman niin, Mizoramah pawh Aizawl leh district hrang hrangah urhsûn taka hman a ni.
Police Commemoration Day hi Aizawlah chuan zing dar 7-ah 1st battalion MAP hmunah DGP SBK Singh hoa hman a ni a; India ram hmun hrang hranga September 1, 2018 leh August 31, 2019 inkara duty laia thi police 265 hming chhiar chhuah niin, sûnna hun hman a ni. September 1, 2019 leh August 31, 2020 chhung hian Mizoram Police zingah duty laia nunna chan an awm lo.
Sûnna hun hman zawhah Mizoram police, duty laia hmelma kut tuara thi tawhte hriatrengna Martar Thlan, 1st MAP Headquarters-ah DGP leh police officer-te'n pangpar an dah leh bawk.
Police Commemoration Day hmanna pui ber, National Police Memorial, Chanakyapuri, New Delhi-ah chuan Mizoram police aṭangin head constable C Lalsangmawia leh constable Malsawmkima te an tel a; Mizoram police aiawhin flag bearer-ah an ṭang.
Lungleiah chuan Police Commemoration Day pualin August 14, 2020-a Bindhiasora bula Bru National Liberation Front-te'n an kah hlum tak constable C Thangduna sûnna hun hman a ni.
Serchhipah pawh he ni pual hian November 29, 1997-a Chhatisgarh-a Naxalite-te bomb kam an chìl puah vanga thi constable Biakrotluanga chhungte hnenah tawrhpuina lantir nan pangpar leh thilpek dang an hlan.
India ram chhunga awm Aksai Chin pèla rálthuam nena lut ru China sipaite'n India ram veng tura thawk (duty) mek India police-te chu Hot Springs (Ladakh)-ah October 21, 1959 khan an lambun a, police 10 an thi. October 21, 1959 chu India sorkar chuan ram tana nun pe police-te hriatrengna leh chawimawina ní - Commemoration Day atan a puang a, ram pumah kum tin hman a ni.