Covid-19 vei hmuh thar 30 zingah Mizorama kái chhâwng 23 an awm

October 20, Thawhlehnia Mizorama Covid-19 vei mi 30 hmuh chhuah zingah Mizoram chhunga kái chhâwng mi 23 an awm a; mi 23 zingah taksaa harsatna nei (Covid-19 symptom lang) mi pasarih an awm.

Covid-19 positive hmuh thar mi 30 zingah state páwn aṭanga rawn lut chu mi pasarih chiah an awm a, hnam dang vek an ni a; Mizoram chhunga káite chu Mizo deuh vek niin, Gorkha pakhat a tel.

Thawhlehnia hripui vei hmuh chhuah, Mizoram chhunga kái mi 23 zinga pasarih chuan taksaah harsatna an nei a, Aizawla mite chu dedicated covid hospital - State Referral Hospital (ZMC)-ah dah luh an ni, mi 16-in symptom an nei lo. Mi 23 zinga 22-te chu an kài ṭanna a hriat theiha ngaih a ni a; mi pakhat erawh chu a kai chhan hriat a ni lo.

Dawrpui venga hripui vei hmuh thar pangate chu an kài chhan hriat veka ngaih a ni a; pathum chu chhungkaw khata mi an ni. An nu ber positive tawh vanga an ina inkhung mek leh sample endik an ni a, an zinga pahnihin symptom an nei.

Ramhlun South LTF Secretary sawi danin, an venga hripui vei hmuh thar pangate chu chhungkua an ni a; nu leh pa kum 33 mi ve ve leh an fanute pathum - kum 5, kum 3 leh thla 8 mite niin, an zinga pathumin symptom an nei. An pa ber hi Dawrpuia Covid-19 positive contact zinga mi a ni a, chuta ṭanga kai chu nia hriat a ni.

Serchhipa veng pahnih - Chanmari leh P&E Venga hmuh chhuah thar pariatte pawh tualchhunga kai vek an ni a; TrueNAT-PCR hmanga endiknaa hmuh chhuah mi pasarihte chu a hma lawka hripui vei tawhte nena inchhungkhat an nih laiin, RAT hmanga hmuh chhuah hmeichhe pakhat erawh chu mi hrang daih, a kaina hriat loh a ni.