Chief Miniter-in Hindu ram din tumah BJP puh
14th Finance Commission-in special category state min hrêk: Lal Thanawla
Chief minister Lal Thanhawla chuan sorkar laipuiin a pawm tâk 14th Finance Commission (FC) report-ah lawmna tur a awm lo tih a sawi a, "Special category state kan tihte min hrêkna mai a ni," a ti.
Lal Thanhawla hian nimin khan Congress Bhavan-ah thu sawiin, "14th FC report hi a tirah lawmna tur a tama a lan laiin, chutiang a lo ni hauh lo. A tirah chuan kan lawm hle a, mahse kan hre chiang a, lawmna tur a awm hauh lo. A hma chuan Central-in pawisa 90% a tumin state-in 10% kan tum ve ṭhin. Tunah chuan 50-50 te, 75-25 tihtein hma an la chho ta a ni," a ti.
Sorkar laipui tum ber chu India ram Hindu rama siam a nih thu sawiin Chief Minister chuan, "Sorkar laipui khu RSS-te thunun an ni a, anni hian Krisian leh Mosolman-te hi India sakhuaah an pawm ve lo. Heng sakhaw pahnih luh hma hian India hi Hindu ram a ni an ti a ni," a ti a; India rama Kristian tam tak chuan harsatna an tawk mek niin a sawi.
Lal Thanhawla chuan, sikul kai hun sawn hma dodal an awm chu pawi a tih thu sawiin, "Mipuite tana ṭha tur sorkar kaihruaitute hian a ngaihtuah ṭhin. Hnam insiamṭhat nana education hmalakna hi thil ṭha leh lawmawm tak a ni a, hnam ang pawn lawmthu kan sawi tur a ni. Zir tawh lo leh buaipui tur nei tawh lote chu kut kuangkuaha lo awm mai tur an ni," a ti.
Chief Minister chuan, Mizote chu taima leh tho hma hnam kan nih ṭhin thu sawiin, "Pi leh pute an tho hma em em a, chu chu kan chhawm chhoh zel hi kan hnam ṭhanna tur a ni. Tho hma mi chuan zing karah thawh tur tam tak a nei a ni," a ti a; sikul ṭan hma chuan thawh hma a ken tel avangin a ṭha hle tih a sawi.
Ṭhang tur leh hma lam pan turin thil thar enchhin ngam a ngaih thu sawiin Lal Thanhawla chuan, "Thil thar enchhin nachang hriat loh chuan ram leh hnam hian hma a sawn lo ang. Min tlân pêltute ûm tur kan nih chuan thil thar hi kan chhin a ngai a ni," a ti.
Chief Minister chuan, RMSA hnuaia laboratory assistant leh clerk-te bàn an nih chungchangah, "Mizoram sorkar bàn an ni lo a, Central sorkarin pawisa an dah tawh loh vanga tawp mai an ni. Lainat em em mah ila tihngaihna a awm rih loh avangin thlamuan ngaihna pawh kan hre lo," a ti a; RMSA hnathawkte bàn an ni chu politics-a inbeihna atana hman chi a nih loh thu a sawi.
CM thusawi Ṭhenkhat:
• 14th FC report-ah lawmna tur a awm lo
• Sorkar laipui tum ber chu Hindu ram siam a ni
• Sikul kai hma hi thil ṭha tak a ni
• Zing tho hma ṭhin hnam kan ni
• RMSA hnathawkte kan lainat em em