KHAWTHLIR

Thisen pe
Health Worker Training Institute-a zirlaite chuan, nimin khan Aizawl Civil Hospital Blood Bank-ah kalin thisen unit 53 an pe a, a petute hi mipa 37 leh hmeichhia 16 an ni. Mamit College NSS Unit-te pawhin Ningani khan Mamit District Hospital-ah thisen unit 23 an pe a, a petute mipa 13 leh hmeichhia 10 an ni.

World Breakfast Day
Nimin khan World Breakfast Day a ni a, he ni pual hian Young Women Christian Association (YWCA), Aizawl chuan Mizoram State Cancer Institute-a cancer vei damlote tan nimin zing khan tukṭhuan an buatsaih.Inkhawmah hian cancer veite pualin an ṭawngṭai a; damlote tana chaw ṭha chaw an sem bakah, damlo harsa zual mi panga hnenah ṭanpuina pawisa an hlan.

Lawngtlai Khelmual enfiah
Minister C Ngunlianchunga chuan nimin zing khan Lawngtlai College Veng YLA Field a tlawh a, khelmual laih chhunzawm dan tur a enfiah. C Ngunlianchunga chuan, khelmual chu siam zawh vat a nih theihna atan theihtawp chhuah a tum thu a sawi.

Mamitah seminar
Govt. Mamit College leh Internal Quality Assurance Cell ṭangkawp chuan nimin khan Mamit I&PR conference hall-ah ‘Scenario of Higher Education in India and the Role of IOAC in Quality Improvement’ tih thupuia hmangin seminar an buatsaih.

Kum 15-na lawm
Lawngtlai Auto Rickshaw Owners & Drivers Association chuan nimin khan an kum 15-na Lawngtlai AOC Veng YLA Hall-ah an lawm. Inkhawmah hian Transport department-a thawkte'n lirthei khalhtute chu Traffic Rules an hrilhfiah. Lawngtlaiah hian auto-rickshaw khalha ei zawng hi mi 300 vel an awm.