MNF-in disturbed area puan an duh lo

MNF Publicity, Media & IT department-a general secretary Lal­ruatkima chuan, MNF party chuan Mizoram hmar lam hmun ṭhen­khatte 'disturbed area'-a puan an duh loh thu a sawi.

MNF Publicity, Media & IT department hotute chuan nimin khan Aizawl Press Club-ah thuthar thehdarhtute an kâwm a; Lalruatkima chuan disturbed area puan a nih chuan a huam chhunga mipuite'n an tawrh dawn thu sawiin, "A tuartu tur chu HPC(D)-te chauh an ni lo a, mipuite'n an tuar dawn a ni," a ti.

Disturbed area puan an tum chhan chu Central aṭanga sum hmuh theih an ît vangah puhin, Assembly House-ah ‘Zofate inpum khatna tichhe thei zawngin hmalak ni lo rawh se’ tih resolution pass tawh nen a inkalh tlat thu a sawi.

Zawhna chhangin Lalruatkima chuan, HPC(D)-te chet dan chu dan kalh a nih thu leh ṭha lo an tih thu a sawi a, "HPC(D) vanga buaina hi dawhkan kîla inbiakna hmanga chinfel theihah kan ngai," a ti.

Lalruatkima sawi danin, Cong­ress party-in HPC leh HPC(D)-te chu inremna a siampui tawh a, Mizoram hmar lamah auto­nomous district council pek a tiam a, an inremna anga a tihhlawhtlin leh si loh avangin HPC(D)-te chu an che ta niin MNF party chuan an ngai a ni.

Lalruatkima chuan, kum 1986-a Hmar People's Convention (HPC) hel a din hnuah CM Lal Thanhawla kaihhruai Mizoram sor­kar nen July 27, 1994-ah Memorandum of Settlement an ziak a, HPC sipai 308 chu silai nen sorkarah an inpe niin a sawi a; inremna point 6.1-ah chuan, HPC demand area chu autonomous district council-a dah turin Mizoram sorkarin hma a la vat ang, tia ziah a nih thu a sawi.

Lalruatkima sawi danin, sorkar­in ADC a pek loh avangin HPC-a lungawi lote chuan Lalhmingthanga Sanate hoin kum 1995-ah HPC (Democratic) an din a, September 2011-ah Lalhmingthanga Sanate chu president aṭanga paih niin, amah thlaka chairman turin H Zosangbera an dah a ni. Lalhmingthanga Sanate leh a hote chu an la ding ve zel tih a sawi.

Lalruatkima chuan, Congress party chuan MNF sorkar laiin sorkar tibuai turin HPC(D)-te an hmang nia sawiin, kum 2008 MLA inthlan dawnah Congress party leh HPC(D)-te chu Aizawl leh Imphal-ah an indawr niin a sawi.

June 2012-a HPC(D) chairman H Zosangbera, army chief Lalropuia Famhoite leh deputy army chief Lalropuia-te police-te'n an man chu Chalhfilh bialah bye-election a awm dawn avangin chhuah an nih thu Lalruatkima chuan a sawi.

MNF Media hotute chuan, HPC(D) H Zosangbera pawlte do lêt nan HM R Lalzirliana'n HPC(D) phel leh lam Lalhmingthanga Sanate pawlte chu a vulh ta vak nia sawiin, "Heng mite hi huangtau takin Mizoram hmun hrang hrang Hmar hnam bitna hmunah zalen takin an che a, Aizawlah ngei pawh an awm reng niin a lang," an ti a; tun hnaiah Kolasib Tuiṭhaveng, Saiphai, Sesawng leh Hmar hnam tamna khaw hrang hrangah thâwm an nei niin a sawi.

Lalruatkima chuan, kum 2012-a V/C inthlanah HPC(D)-te vanga Hmar lam bial khaw 13-ah inthlan buatsaih theih a nih tawh loh hnuah, kuminah pawh HPC(D)-te vang bawkin khaw 30-ah V/C inthlanna neih theih a ni dawn chu, "Dan leh thupek kenkawh kawngah sorkar a hlawhchham let der tih a lang chiang hle," a ti.