Thla 3 chhungin TB vangin mi 23 thi

Kumin January-March, thla thum chhungin Mizoramah Ngawr (Tuberculosis) vanga thi mi 23 an awm tawh a; Mizoram pumah Multi Drug Resistant-TB (MDR-TB) vanga thi mi paruk an awm tawh bawk.

Health department hotute hnen aṭanga thu dawn danin, January-March 2015 chhungin Mizoram pumah TB vei mi 540 hmuh chhuah a ni a; TB vangin mi 23 an thih laiin, TB vei mi 448 chu tihdam an ni.

TB vei nia inringhlelte tan Mizoram sorkar damdawi-inte leh kohhran damdawi-in (34)-ah inenfiah theih a ni a, a veite enkawl nghal theih a ni bawk. TB vei chu a hunbi ang tak leh ei zat tur ang taka damdawi a ei loh chuan TB chu damdawi pangngaiin a tihdam theih loh, MDR-TB ah a chang thei a ni.

State Referral Hospital-ah MDR-TB veite enkawlna bik a awm a, Cardridge Based-Nucleic Acid Amplification Test (CB-NAAT) hmangin enkawl an ni. MDR-TB vei laite enkawl zuina (follow-up) tur, Culture and Drug Sensitivity Testing (C&DST) Laboratory tur chu State Referral Hospital-ah sak mek a ni bawk.

Mizoramah MDR-TB vei mi 47 an awm tawh a, chung zinga mi 25 chu tihdam an ni tawh a; mi paruk an thi tawh a ni.