Congress hunlaia a dan bawhchhiat Bawhchhe lehah Lalduhoma puh

MNF chuan thuchhuah siamin, ZPM Legislature Party leader Lalduhoma chu Congress president ni tawh a nih thu tarlangin, "Kum 1984-ah chuhtu awm lovin Congress ticket-in MP-ah thlantlin a ni. Chumi hnuah chuan Congress chhuahsanin pawl hrang hrang, Congress for Peace leh a dang dangte dinin a tlansan a ni," a ti.

Lalduhoma chu Congress MP ni chung siin a party din MNU ticket-in MLA a chuh nia tarlangin MNF chuan, "Congress party hian hun rei tak chhung chu dawhthei takin an en hram hram zel a ni. Nimahsela a tawpah chuan an tan tihngaihna a awm tak ngang loh avangin, a thlangtute leh ram mipui pawh zah hauh lova amah pawh tela dan siam ngei Anti-Defection Law chu a bawhchhiat tak avangin, Congress MP-ten an hek a kum 1988 khan MP aṭangin ban a ni," an ti a, India ram history-ah he dan bawhchhiat avanga MP ban hmasak ber a nih thu an sawi.

MNF chuan Lal­duhoma chu MLA-ah independent ticket-a thlantlin a nih thu tar­langin, "Tunah phei chuan Anti-Defection Law-a 'hmun thuma ṭhena hmun khatte rem­tihnain pawl sawn theih' tih dan lo awm thin kha paih vek a ni tawh nghe nghe. Chuti chung chuan Independent ticket-a thlantlinin ZPM political party-a zawm tak thu mipui hmaah puangin, chanchinbu leh media hrang hrangah a darh chuai chuai a ni. MNF-te pawhin dawhthei takin kum hnih deuhthaw kan lo thlir tawh a ni," an ti.

MNF chuan Cong­ress-te pawhin, an hun lai khan, tihngaihna dang a awm tawh ngang loh hnua Lok Sabha Speaker hnenah an hek ta ang khan, tunah hian MNF MLA-te pawhin Assembly Speaker hnenah an thlen ve ta nge nge tih an tarlang bawk.