Lunglei DEO pisa kái tur dang

Lungleia Sikul Ṭan Hma Duhlo Pawl intite chuan sikul kai hun tihhma duh loh lantir nan Ningani leh nimin khan Lungleia district education officer mawhphurhna la mektu HS Zosangliana pisa kai tur an dang a; Ningani khan anmahni hnawh darh tumtu police-te nen an innawr.

Thu dawn danin, Ningania DEO pisa kai turte an dannaah, HS Zosang­liana chu lo dang mah se, police-te'n a pisaah an hruai lut a; police-in hruai luh an tumna lamah pisa kai tur dangtute nen an innawr.

Sikul Ṭan Hma Duhlo Pawl-te chuan thuchhuah siamin, police-te nen an innawrnaah Lalngaihzuali, Hauruang a hliam niin an tarlang a; a inenkawlna senso tumsak turin sorkar an phût a ni.

Niminah pawh khan DEO pisa bulah mi 150 vel an pungkhawm leh a, Ninga­nia police-te chêt dan an demna thu ziahna banner-te an keng. Nimin bikah hi chuan buaina leh harsatna lian tham a awm lo a, DEO pisaa thawkte pawh pisaah an lut ta bik lo a ni.