Inthlan tur atan inbuatsaih zel

April 30, 2015-a village council leh local council inthlan tur atan hmun hrang hrangah inbuatsaihna kalpui zel a ni.

Aizawlah chuan nimin khan Aizawl DC Dr Franklin Lal­tin­khum­a hoin a pisaah District Level Standing Committee an ṭhukhawm.

Meeting-a tarlan danin, Aizawl district-ah V/C inthlan tur atan polling station 69 leh polling booth 80 a awm a, candidate 810 an awm. Aizawl khawpuia LC inthlan turah polling station 83 leh polling booth 165 siam a ni a, seat 528 awm­ah candidate 1,230 an awm.

Serchhipah chuan nimin khan presiding officer leh assistant presiding officer-te tan DC conference hall-ah training buatsaih a ni. Training hmanpuitu, Ser­chhip DC Juhi Mukherjee chuan, training-a telte chu inthlanna felfai leh thianghlim buatsaih chu an mawhphurhna a nih avangin, fimkhur tak leh ṭhahnemngai taka hna thawk turin a chah.

Serchhip district atan hian presiding officer 56 leh assistant presiding officer 56 ruat a ni a, training zawhah inthlannaa hman tur hmanruate pek nghal an ni.

Mamitah chuan DC Vanlal­ngaihsaka'n political party hrang hrang aiawhte a kawm a, in­thlan tur atana an inbuatsaihnate hrilh­fiahin, inthlanna felfai leh muan­awm tak a awm theihna atan thawhpuiah a sawm.

Vanlalngaihsaka chuan ballot paper chu uluk tak leh fimkhur taka buatsaih a nih thu sawiin, "A hun taka semchhuah theih turin peihfel vek a ni tawh," a ti. Inkawmna a zawh hnu hian political party aiawhte chuan DC hoin strong room an endik a ni.