KHAWTHLIR

Mizoram sorkar chuan Inspector General of Police (Law & Order) ni lai LH Shanliana, IPS chu Additional Director General of Police (Addl. DGP) atan a dah. LH Shanliana hi AGMUT cadre, 1998 batch a ni a, Addl. DGP a nihna tura hriattirna (notification) chu nimin khan tihchhuah a ni.

20 Mizoram Inde­pendent Company NCC, Aizawl chuan nimin khan thisen pek rûnpui an huaihawt a, Zoram Medical College blood bank tan thisen unit 26 an pe a, petute mipa 14 leh hmeichhia 12 an ni. NSS State Cell huaihawtin NSS volunteer-te'n Civil Hospital, Aizawlah thisen unit 22 an pe a, Johnson College aṭangin mipa pariat leh hmeichhia panga leh, Synod HSS aṭangin mipa pariat leh hmeichhia pakhat an ni. Civil Hospital-ah hian Krismas puala thisen pe mi 13 dang an awm bawk.

Traffic SP Rodingliana Chawngthu chuan nimin khan thupek chhuahin, SIPMIU-in vawiin hian zing dar 9 aṭanga tlai dar 5 inkarah Company Péng leh Singson Petrol Pump inkar kawngpuiah tui pipe phûm hna an thawh dawn avangin, hnathawh tibuai thei tura kawngpui sírah lirthei leh bungrua dah phal a nih loh thu a tarlang.

Chief minister Zoramthanga chuan CM Discretionary Grant 2020-21 aṭangin chhawmdawlna sum sem turin nimin khan Rs. 2,42,000 a pe chhuak. Pawisa hi Mizoram hmun hrang hranga damdawi-in, orphanage, rescue centre, home, etc. ahte Krismas thilpek atana pek tur a ni.

State Referral Hospital-ah nimin khan Covid-19 vei mi pathum dah luh an ni a, anni nen SRH-ah hripui vei mi 18 an awm mek. SRH-ZMC Bulletin tarlan danin, mi 18 zinga pakhat chu ICU-ah awmin, oxygen nen enkawl a ni a, mi dang zawng Isolation ward-ah awmin, an zinga pali chu oxygen pek mek an ni. SRH-a awm mek zinga hian kum 60 chung lam pasarih leh kum 14 hnuai lam pahnih an tel.