Arsa leh artuia intodelhna project
Krishi Vigyan Kendra, Kolasib district hnuaia ar vulhtute dâwm kânna leh arsa leh artui a intodelhna tura duan, ‘Improving Livelihood and Nutritional Security through Backyard Poultry Production Project‘ chu nimin khan hawn a ni a, bawrhsap Dr H Lalthlangliana‘n a hmanpui.
Project hi Kolasib district-a ar vulhtute dinhmun chawikanna tura eizawnna ngêlnghet siam nan leh ar sa, artui leh ar notêa mipui an intodelh theihna tura duan a ni a; project kalpuina sum chu ICAR-Vivekananda Parvatiya Krishi Anusandhan Sansthan, Almora, Uttarakhand aṭangin Rs. 6,00,000 hmuh a ni.
He project kalpui tur hian zone pasariha KVK 43 zingah panga thlan a ni a, Mizorama kalpui turin KVK, Kolasib district thlan a ni. Kolasib, Lungmuat, Thingdawl, Kawnpui leh Buhchangphai aṭangin ar vulh hlawhtling thei tura ngaih mi 10 ṭheuh thlan a ni a; ar notê 50, ar note chaw kar thum daih bakah, khaw pakhat tana inhman ṭâwm tur artui tihkeuna kháwl leh inverter pek a ni.