State leh ram páwna Zo hnahthlakte'n Mizoram mipui thlavang an hauh

Mizoram leh Assam ramria buaina awm mekah state leh ram páwna Mizo páwl hrang hrangte'n thuchhuah siamin Mizote thlavâng an hauh a; Mizoram mipui puih an inhuam thu an tarlang hlawm.

Mizo People Convention (MPC), Manipur; YMA Manipur Group leh MZP headquarters, Manipur-te chuan thuchhuah inṭâwm siamin, "Mizoram leh Assam ramri buaina avanga kan Mizo mipui pawisawi lo tam tak tawrhna hi kan ṭâwmpui a, ram leh hnam chhan nana lu chhum bán chhum huama rammu Mizo ṭhalai rualte zahna chibai kan bûk a ni," an ti.

Hmun dang aṭanga dàn loa India rama lutte'n Zo fate Jerusalem zah lo taka néka tharum hmanga an bei chu an dem tih tarlangin pawl pathumte chuan, "Tharum hmanga rawn bei an awm emaw, thiamna leh finna hmanga bei an awm emaw pawhin, zâm loa do zel turin puan ven i sawi chhíng ang u. Ramri buaina avang hian Mizoramin ni tin mamawh lak luh leh thil dangahte harsatna a tawh theih avangin Manipur-a Mizote hian eng kawngah pawh puih kan inhuam a, kan tlânchhe dawn lo a ni," an ti. 

Tahan Mizo Ṭhalai Pawl (MṬP) chuan, Assam leh Mizoram ramri buaiah Mizoram mipui thlavang hauhin, "Kan unaute lo thlaphâng lo turin kan duh che u. Kan ṭangkai ve theihna a awm chuan kan theihna chinah kan tlanchhe lo ang. Assam-in ei leh barah harsatna siam mah se, in unaute hian kan tih theih a tê emaw, a lian emaw, theihtawp chhuah kan tum," an ti a; Mizote chu ram hrangah awm mah se, chhûl khat kual an ni tih theihnghilh lo turin an chah.

Paite Tribe Council, Lamka chuan, Assam leh Mizoram ramri buaiah Mizorama an unaute an rilruah a awm reng thu tarlangin, "A theih ang anga kan unaute pui turin kan inhuam reng a ni. Mizoram lamah kan ṭang tlat. Dan loa lut Assam mite chêt dan hi a demawm tak zet a ni," an ti.

Vaiphei Students Association, Churachandpur chuan, Assam official-te chêt dan demin, "Thlahtute aṭanga Mizote ram humhim tur hian Mizo mipui kan thláwp tlat a ni," an ti a; buaina chu chingfel vat tura sorkar laipui an phût thu an tarlang.

Central Young Kaipeng Association, Tripura chuan, Assam leh Mizoram buaina chu pawi an tih thu tarlangin, "Kaipeng ṭhalaite hian a ṭulna apianga Mizo ṭhalaite ruala ke pên turin kan inpeih reng a ni tih Mizo mipuite'n min hriatsak turin kan duh che u. Unau chhûl khat kual kan ni tih kan theihnghilh ngai lo ang," an ti.