Thla 3 chhungin RUSA sum la pe lo Advertisement loin RUSA thawktu 22 la

Sorkar laipuiin college tihhmasawnna tura a din, Rastriya Uchchatar Shiksha Abhiyan (RUSA) hnuaia Mizoram sorkarin college 21 tihhmasawnna tura Central aṭanga cheng nuai 236 a dawn tawh chu nodal department emaw, college emawte hnenah a la pe chhuak lo. Hetih lai hian, RUSA-a thawk tur an lak zinga mi 22 chu advertisement chhuah loa lak an ni.

Thu dawn danin, kum 2013-a kalpui ṭan, RUSA hnuai­a Mizorama college 21-te tihchangtlunna atan sorkar laipui chuan January 2015 khan cheng nuai 236 a rawn pe a; pawi­sa hi dan angin Central-in a pek aṭanga ni 15 chhunga RUSA-ah pek chhuah tur a nih laiin, Mizoram sorkara Finance department chuan tun thlengin a la pe chhuak lo.
Cheng nuai 236 hi first installment a ni a, college 21-in a vaia an dawn tur chu nuai 4,200 a ni. College pakhatin cheng nuai 200 zel an chang tur a ni a, first installment pek chhuah tawh nuai 236 chu college 21-te'n nuai 10 vel ṭheuhin an chang thei dawn a ni.
Mizoram RUSA-in Central aṭanga pawisa a dawn tura 35% chu college sak tharna leh tihchangtlunna tur a ni a, 35% dang chu college chei tharna tur a ni. 30% dang leh chu library, sports bungrua, college bungrua leh ṭul pawimawh leina tura ruahman a ni.
Mizoram RUSA hian inbuat­saihna leh bul ṭanna atan Central aṭangin nuai 270 an dawng tawh a, chung zinga nuai 30 chu Mizoram sorkar aṭanga an dawn tur a ni. Nuai 270-ah hian thawktute hlawh leh ṭul pawimawh hrang hrang atan hman nghal a ni.
Thu dawnnain a sawi danin, RUSA hnuaiah hian September 2014 khan thawktu eng emaw zat lak a ni a, thawktu lak dawnah advertisement tihchhuah a ni lo a, Aizawl district-a Employment Exchange-ah pawh hna lak tur dilna a awm lo.
RUSA-a thawk tur lakte chu - PS to Member Secretary to State Higher Education Council, Finance Officer, Assistant Management Information Officer, Engineer, Assistant, UDC, Computer Operator, Data Entry Operator, Digital Documentation Cameramen, Accountant, Cashier, LDC pahnih, Receptionist pahnih, Chowkider, Despatch Rider, Driver, Sweeper leh IV Grade pali an ni.
Mizoram RUSA-ah hian member 15 an awm a; chairman chu Higher & Technical Education minister R Romawia niin, vice chairman chu H&TE changtu parliamentary secretary H Zothangliana a ni a, H&TE secretary K Lalnghinglova chu project director a ni.