KHAWTHLIR

Thisen pe
Salvation Army Central North Division SAY-te chuan, Mizorama Salvation Army din champha, April 26 pualin Inrinni khan Aizawl Bazar corps-ah blood donation camp an buatsaih a, Aizawl Civil Hospital tan thisen unit 151 an pe a, a petute mipa 126 leh hmeichhia 25 an ni. Inrinni vek khan Aizawl Temple Taxi Stand Welfare-te'n ACH-ah thisen unit 10 an pe bawk.

Tawng zirho
Mizoram University-a Mizo department leh Mizo Academy of Letters-te chuan, ICSSR leh MZU bultumin April 22-24, 2015 chhung khan MBSE Conference Hall-ah 'Tribal society, language and literature of north east India' tih thupui hmangin seminar an buatsaih.

Synod-in tanpuina Rs 12,11,000 pe
Mizoram Synod chuan tun hnaia hmun hrang hranga rial tlain in a tihchhiatte hnenah chhawmdawlna Rs. 12,11,000 a pe. Chhawmdawlna pek dan chu, Serchhipa in 15 tan Rs. 75,000, Bungtlanga in 168 tan Rs. 7,44,000, West Bunghmuna in 26 tan Rs. 1,33,000, Bung­hmun North-a in 45 tan Rs. 1,79,000, Sateeka in 13 tan Rs. 48,000, Maubuanga in pahnih tan Rs. 11,000 leh Maubuang Lungsaia in pali tan Rs. 21,000 a ni.

Buhfaitham Pathianni hmang
Nimin Pathianni khan Baptist Church of Mizoram chuan 'Buhfaiṭham Pathianni' an hmang a, BCM hmunpui aṭanga thupui thlan, 'Pe rawh u, tichuan pekin in awm ang' tih hmangin thuchah an ngaithla a, kohhran tinah thuchah chhiar chhuah a ni. BCM hian kum 2014-15 chhung khan buhfaiṭham aṭangin Rs. 4,75,86,529 an hmu a ni.

Bial Inkhawmpui
Presbyterian Kohhrana pastor bial hrang hrangte chuan April 24, 2015 aṭangin Bial Inkhawmpui an hmang a, nizan khan a ṭiak. Bial Inkhawmpuiah hian a ṭan zanah palai lawmna leh report inkhawm neih a ni a, Inrinni khan nilengin rorel inkhawm neih niin, kohhran aṭanga agenda lutte ngaihtuah a ni.