Ral aṭanga Central tâwngah puh

MNF chuan thu­chhuah siamin, chief minister Lal Thanhawla chu ràlkhat aṭang ringawta Central sorkar tâwng ṭhinah an puh.

MNF chuan, 14th Finance Commission-in special category state-te hrêk a tum anga CM Lal Thanhawla'n a sawi rual hian, hma la turin special category state dang CM-te biain ngaihtuahna a seng tawh em, tiin an zawt a; CM Hawla chu hma la loa 'Uipui tui lian thlir' vel mai maiah an puh a ni.

MNF chuan, "Central-in 90% leh state-in 10% ni mek chu, 14th FC hnuaiah state maching 75:25 a nih dawn thu a sawi a. Hetianga 14th. FC-in kalpui a tum dan hi state humhalh ngai bikte tan tlin ngaihna a awm loh thu hre tur pawl taka ngaih, 9th FC member pawh lo ni tawh Pu Lal Thanhawla hian thil nih phung dik tak Mizo mipuite hrilh hi a bat a ni," an ti.

MNF tarlan danin, MNF sorkar lai, 11th Five Year Plan-ah SSA Mission-a sharing system chu 75:25 a ni a, Central leh state sorkarin a zatvein an intum sem tura tih a ni. Mahse khatih laia School Education minister Dr R Lalthangliana'n Guwahati-ah NE State Education Minister Conference a huaihawt a, NE state dangte nen nasa taka an nawr hnuah hmarchhak state-te tan Central-in 90% leh state-in 10% tum turin an nawr hlawhtling niin an sawi.