MSU-in lungawi lohna lantir an titawp

Mizo Students Union (MSU) hruaitute chuan Inrinni khan Aizawl Press Club-ah thuthar thehdarhtute kâwmin, sikul ṭan hma duh lohna an lantirah sorkar nen inremna an neih avangin April 28-a Aizawla kawngzawh an tum leh April 29-a khaw hrang hranga total bandh huaihawt an tum chu an ṭhulh tih an puang.

MSU president PC Lalrinhlua chuan, April 24 zan leh April 25 zinga School Education minister H Rohluna pisaah department hotute nen an inkawm thu sawiin, "Sikul kai hun sawn hma sût chungchangah sorkar chuan tun session kal lai mekah hian hman phawt a, a ṭhatna leh ṭhat lohnate uluk taka enfiah a, a hman zui zel dan tur chu a ṭul ang zela ruahman a rem ti," a ti a; sikul kai hun zir chiangtu tur sorkarin state leh district huapin a din dawn tih a sawi.

Sorkar leh MSU inremna
1. Kum 2015-16 academic session aṭanga sorkarin sikul zawng zawngte hman tura sikul kai hun a sawn hma chu academic session kal lai mek chhung atan hman phawt a ni ang a; chumi chhung chuan a ṭhat zawkna leh ṭhat lohnate enfiah a ni ang. Thla thum chhungin a enfiahtu tur MSU aiawh telna state level leh district level-ah sorkarin a din ang.
2. Khawpui daifém leh zirlaite tana sikul panna kawng hla zualte tana public transport service tihchangtlun dan tur sorkarin a ngaihtuah mek hi ruahmanna ṭha lehzual leh mumal zawk a awm theihna turin sorkarin hma a la zel ang.
3. HSLC leh HSSLC examination atana selection test awm ṭhin hi sorkar sikul zawng zawngah tihtawp a ni ang a, private school-te pawh selection test an neih ṭhin titawp turin sorkar a hriattir ang.
4. Admission fee leh monthly fee sorkar bituk aia sang la an awm leh awm loh sorkarin ngun takin a enfiah ang a, chutiang sikul an awm chuan an chungah dan angin sorkarin hremna a lekkawh ang a, a ṭul chuan school permission suspend/tihtawp sak thlengin hma a la ang.