AVBD-in thisen pe turin mipuite sawm

Association for Voluntary Blood Donation (AVBD) chuan thuchuah siamin, Mizo mipuite thisen pek uar zel turin an sawm.

AVBD chuan, a thlawna thisen pek (voluntary blood donation)-ah Mizoramin hma a sawn viau a, kum hmasa lamah voluntary donation 97% hial a thlen tawh hnua kum 2014-15 ah 76.49%-ah a tlakhniam avangin ṭan a ngai hle tih an sawi a, "A thlawna thisen pek a tlakhniam chhan ber chu thla nga chhung vel blood bank tam takin blood bag an neih tlem vang leh tlâkchham vang niin a lang," an ti.

AVBD tarlan danin, blood processing fee chawi ngai mah se, sorkar damdawi inah chuan pawisa chawi ngai loa pek chhuah a tam hle tho a, Aizawl Civil Hospital-ah chuan thisen an pek chhuah zinga 50% vel chu a thlawna pek chhuah a ni.

Blood processing fee hi RSBY-a inziak lut leh BPL chhungkuaa mi zawng zawngte leh natna benvawn nei, thisen pek reng ngai ang chite'n an pek a ngai lo a; nu nau nei, JSSK aṭanga hamṭhat­na dawngtute'n nau neih kaih­hnawiha thisen pek an ngaihin an chawi a ngai lo bawk.

AVBD chuan Mizo ṭhalaite thisen pe tura sawmin, "Kan thisen hmanga mi dangte tana malsawmna ni a, mi nunna kan chhan thei a ni. Blood bank hrang hrangah thisen a pek theih a, blood donation camp-ah kher pek tum lo a, blood bank-ah mahnia kala thisen pek uar zel turin kan insáwm a ni," an ti.

Thisen sawngbawlna senso lak chu hnual phah nan hmang lo tura ngenin, "Processing fee lak a ni emaw, ni lo emaw, damlo, thisen mamawhtute'n an mamawhna a ngai reng a, thisen petu an awm loh chuan nunna chhan theih reng pawh chhan lohin an awm phah thei a ni," an ti.