Nepal lirnghingah Mizo awmte an him

April 25 chhuna Nepal rama lirnghing na takah Nepal-a Mizo awmte an him niin Nepal aṭangin Vanglaini chuan thu a dawng.

Nepal-ah hian Mizo 150 bawr vel cheng anga ngaih an ni a, heng zinga mi 100 bawr vel hi chu kohhran hrang hranga rawng­bawltute leh an chhungte an ni. Vanglaini chuan Nepal-a Mizo awmte hi a theih angin a be pawp a; mi 2,000 bawr vel an thihna lirnghingah hian Mizo thi leh hliam an awm lo niin an inngai.

Pokhara hmuna Presbyterian pastor Rev PC Nghaklianmawia chuan, "Inbiak pawhna a chhiat nual vangin kan inbe kim thei lo a; amaherawhchu Mizo awmte hi chu kan him kimah kan inngai. Kathmandu lamah Mizo hi an ṭhahnem ber a, anni lam pawh an him a, Pathian venna kan dawng a ni," a ti.

Thudawn danin Kathmandu-a Mizo awm tam zawk hi Kath­mandu-a Synod Mission Board Field Secretary Rev Lalrintluanga Ngente chênna in tual zawlah Inrinni zan khan an riak a, lirnghing chhunzawmna (after shock) a awm leh ṭhin avangin in chhunga riak lo tura thurawn an nih angin nunaute nen tualzawlah hian an mu a, a tam zawk chu an tlaivar a ni.

Kathmandu-ah hian Presby­terian Kohhran chuan Bial Inkhawm­pui neiin Lalpa Zanriah Sakrament an ṭhehlai takin lir hi a nghing a, Biak In a sâwi nasat avangin an tlan chhuak a, inkhawm hi pawnah a theih ang angin an chhunzawm ta a ni.

Kathmandu aṭanga kilometre 400 vela hla Katari khuaa awm Rev Daniel Lalmalsawma Sailo chuan Vanglaini zawhna chhangin, "Kan awmna bialah hi chuan chhiatna a thleng tam lo a; nimahsela a sâwi nasa hle a ni. Mizo awmte kan him a, Pathian zarah thlamuang takin kan awm thei e," a ti.

Katari-ah hian after shock a awm leh theih avangin mipuite chu hmun hima insaseng tura tih an ni a, khelmual leh hmun âwl remchangah chuan mipui an awm khat vek niin Rev Daniel Lalmalsawma chuan a sawi. Mizo pastor leh missionary-te chuan harsatna lian tham an tawk lo a; nimahsela an hmunpui Kathmandu lam nen an la inbiak pawh theih loh thu a sawi.

Nepal-ah hian Mizo intel­khawmna pawl, Mizo Welfare Nepal a ding a, an hruaitute hi Kathmandu lama awm an nih hlawm avangin Vanglaini chuan a be pawp thei lo a; nimahsela Nepal hmun danga cheng Mizote chuan an hruaitute nen an inbiaknaah Mizo thi leh hliam an hriat loh thu an dawng.