World Malaria Day hman a ni

April 25 kha 'World Malaria Day' a ni a; he ni pual hian Health department chuan Inrinni zing khan Mizo High School Field-ah inkhawm an buatsaih a, Health secretary Lalhmingthanga'n a hmanpui. District dang­ah pawh World Malaria Day hi hman a ni.

Health secretary Lalhmingthanga chuan, Mizoramah sikserh vanga nunna chán an tam ṭhin tih sawiin, "Thawktute leh mipuite'n theihtawp an chhuah avangin sikserh vanga thihna a tlahniam mek zel a. Mipuite leh department-a thawkte'n sikserh do kawngah tih tur kan nei a, 'Khawsik reng reng in report a, thisen endik vat te, thosi pian theihna tur tihbote hi mipuite tih tur a ni. Thil harsa a ni lo, department-a thawktute leh mipuite'n kan tih turte ti vek ila sikserh a tlem thei ang," a ti.

Health principal director Dr K Ropari chuan thupui, 'Invest in the future: Defeat malaria' tih a sawifiah a, "Mithiamte chhût danin, kum khata sikserh vanga sum hloh a tam em em a, sum hloh a tlem theih nan sikserh hi hneh a ṭul a ni," a ti.

World Malaria Day pual hian Aizawl Thunders-te chuan Bawngkawn aṭanga Ngaizel inkarah kawng an zawh.

World Malaria Day hi Champhaiah chuan Champhai District Vector Borne Disease Controlled Programme leh Christian Medical Association of India (CMAI) ṭangkawp buatsaihin Champhai khaw chhungah kawng zawh a ni a, chumi hnuah Kahrawt YMA Hall-ah inkhawm buatsaih a ni.

Inkhawm chu DVB consultant Dr Lalhmingmawii'n a kaihruai a; Champhai CMO Dr C Zirliana'n thu sawiin, sikserh laka invenhim bakah, sikserh natna ûmbo hna chu mi tin mawhphurhna a nih thu a sawi a; khawsik leh harsatna neite chu hriselna lama thawkte pan hreh lo turin a chah.

Lawngtlaiah pawh Christian Medical Association of India leh District Vector Borne Diseases Control Programme huaihawtin College Veng YLA Hall-ah World Malaria Day hman a ni a, Dr Zothanpari Chhakchhuak-in a kaihruai.

Lawngtlai CMO Dr HC Thangkima chuan, Lawngtlai district chu sikserh hluarna a nih avangin a donaah sorkarin tan a la nasa hle tih a sawi a; January-March 2015 chhungin Lawngtlai district-ah thisen endik mi 7,007 zinga 827-te'n sikserh an vei tih a sawi bawk.